خاشقجی کے قتل کے بعد بن سلمان کا پہلے مغربی ملک کا دورہ

🗓️ 24 جولائی 2022

سچ خبریں:سعودی صحافی جمال خاشقجی کے قتل کے بعد سعودی عرب کے ولی عہد مغربی ممالک کے اپنے پہلے دورے میں یونان جا رہے ہیں۔
روئٹرز خبر رساں ادارے کی رپورٹ کے مطابق سعودی عرب کے ولی عہد شہزادہ محمد بن سلمان سعودی صحافی جمال خاشقجی کے بہیمانہ قتل کے بعد کسی مغربی ملک کے اپنے پہلے دورے میں یونان جا رہے ہیں،رپورٹ کے مطابق یونانی وزارت خارجہ نے اعلان کیا کہ بن سلمان منگل کو وزیر اعظم کریاک مِتسوتاکس سے ملاقات کے لیے ایتھنز پہنچیں گے۔

یونانی وزارت نے تفصیلات بتائے بغیر ایک بیان میں کہا کہ اس ملاقات میں ریاض اور ایتھنز دو طرفہ معاہدوں پر دستخط کریں گے، روئٹرز نے ایک سفارتی ذریعے کے حوالے سے لکھا ہے کہ یہ معاہدے توانائی، فوجی اور سب میرین کیبلز سمیت مختلف شعبوں میں ہوں گے۔

یاد رہے کہ امریکی صدر جو بائیڈن کے انتخابی مہم میں خاشقجی کے قتل کے لیے سعودی حکومت کو الگ تھلگ کرنے کے وعدے کے باوجود، انھوں نے گزشتہ ہفتے سعودی عرب کے دورے کے دوران بن سلمان سے گرم جوشی سے ملاقات کی، میڈیا اور ماہرین کے مطابق بائیڈن نے تیل کی پیداوار بڑھانے کے لیے ریاض کی رضامندی حاصل کرنے کے لیے سعودی ولی عہد کے ہاتھوں سے خاشقجی کے خون کو دھونے کی کوشش کی۔

اس کے باوجود تیل کی پیداوار بڑھانے کے لیے سعودیوں کی رضامندی حاصل کرنے کے لیے بائیڈن کی کوششیں سعودی حکام کی جانب سے فراخدلی کے وعدے کے ساتھ ختم ہوئیں۔