جو کچھ امریکہ نے فلوجہ اور موصل میں کیا ہم غزہ میں کر رہے ہیں:اسرائیل کے سابق نائب وزیر خارجہ

جو کچھ امریکہ نے فلوجہ اور موصل میں کیا، ہم غزہ میں کر رہے ہیں:اسرائیل کے سابق نائب وزیر خارجہ

اسرائیل کے سابق نائب وزیر خارجہ دانی ایالون نے اعتراف کیا ہے کہ غزہ میں جاری کارروائیاں وہی ہیں جو امریکہ نے عراق کے شہروں فلوجہ اور موصل میں کی تھیں، جہاں بڑی تعداد میں عام شہری ہلاک ہوئے تھے۔

الجزیرہ کے مطابق ایالون نے کہا کہ جس طرح عراق میں امریکی حملوں کے نتیجے میں ہزاروں شہری مارے گئے، اسی طرح غزہ میں بھی عام لوگ نشانہ بن رہے ہیں۔ تاہم ان کا دعویٰ تھا کہ عراق میں ہلاکتوں کے ذمہ دار داعش اور القاعدہ تھے اور غزہ میں اس کے ذمہ دار حماس ہے، نہ کہ اسرائیل۔

انہوں نے یورپ میں بڑھتی ہوئی تنقید اور نسل کشی کے الزامات کو بے اثر قرار دیتے ہوئے کہا کہ اسرائیل کو امریکہ اور یورپ کی حمایت حاصل ہے، اس لیے کوئی عملی اقدام یا یورپی پابندی ممکن نہیں۔ ایالون نے مزید کہا کہ ڈونلڈ ٹرمپ کی حمایت کے باعث تل ابیب اپنے اقدامات جاری رکھ سکتا ہے۔

ایالون نے اقوام متحدہ کی اس رپورٹ کو بھی مسترد کیا جس میں غزہ میں قحط کی تصدیق کی گئی تھی۔ ان کے بقول قحط سومالی اور سوڈان میں ہے، غزہ میں نہیں۔

یہ بیانات اس وقت سامنے آئے ہیں جب اقوام متحدہ کے تحت قائم عالمی ادارہ آئی پی سی (IPC) نے گزشتہ ہفتے اعلان کیا کہ غزہ شہر، جہاں تقریباً پانچ لاکھ افراد رہائش پذیر ہیں، باقاعدہ قحط کے مرحلے میں داخل ہو چکا ہے اور آنے والے ہفتوں میں یہ بحران دیرالبلح اور خان یونس تک پھیلنے کا خدشہ ہے۔

اقوام متحدہ کے ادارے FAO، WFP، یونیسف اور عالمی ادارہ صحت نے ایک مشترکہ بیان میں خبردار کیا ہے کہ غزہ میں بھوک بچوں اور شہریوں کی زندگیاں چھین رہی ہے اور فوری جنگ بندی اور انسانی امداد کی فراہمی ناگزیر ہے۔اعداد و شمار کے مطابق، اسرائیل کے حملوں کے آغاز  سے اب تک کم از کم 62 ہزار 200 فلسطینی شہید ہو چکے ہیں۔