پاکستان نے OIC اجلاس میں  غزہ پر اسرائیلی قبضے کے منصوبہ کو مسترد کردیا

پاکستان نے OIC اجلاس میں  غزہ پر اسرائیلی قبضے کے منصوبہ کو مسترد کردیا

پاکستان نے اعلان کیا ہے کہ وہ تنظیم تعاون اسلامی (OIC) کے وزرائے خارجہ کے آئندہ ہنگامی اجلاس میں اسرائیل کے مکمل انخلا، غزہ پر قبضے کی سازش کو مسترد کرنے اور آزاد فلسطینی ریاست کے قیام کے لیے امتِ مسلمہ کے یکجہتی پر زور دے گا۔

وزارتِ خارجہ پاکستان کے مطابق نائب وزیرِاعظم و وزیرِ خارجہ سینیٹر اسحاق ڈار ڈھاکا سے جدہ روانہ ہوں گے، جہاں وہ 3 اور 4 ستمبر کو ہونے والے اجلاس میں پاکستان کی نمائندگی کریں گے۔

اجلاس میں فلسطین کی تازہ صورتِ حال، اسرائیلی جارحیت اور غزہ کو مستقل طور پر ہتھیانے کے منصوبے پر غور کیا جائے گا۔ اسحاق ڈار اپنے خطاب میں پاکستان کے فلسطینی عوام سے غیر متزلزل حمایت کی تجدید کریں گے اور اسرائیلی افواج کے فوری انخلا بالخصوص بیت المقدس سے واپسی کا مطالبہ کریں گے۔

وزارتِ خارجہ نے بتایا کہ وزیرِ خارجہ اجلاس کے موقع پر اپنے متعدد مسلم ممالک کے ہم منصبوں سے بھی ملاقات کریں گے۔

اس کانفرنس کا مقصد غزہ میں انسانی بحران پر غور، فوری امداد کی فراہمی کی حکمتِ عملی وضع کرنا اور اسرائیل کے غزہ پر دائمی قبضے کے منصوبے کے سیاسی و قانونی پہلوؤں کا جائزہ لینا ہے۔