فیصل سلطان نےڈیجیٹل ویکسینیشن پاسپورٹ کو وقت کی ضرورت قرار دیا

?️ 12 جون 2021

اسلام آباد(سچ خبریں) وزیرِ اعظم عمران خان کے معاونِ خصوصی برائے صحت ڈاکٹر فیصل سلطان نےڈیجیٹل ویکسینیشن پاسپورٹ کو وقت کی ضرورت  قرار دیتے ہو ئے کہا ہے کہ ڈیجیٹل ویکسینیشن پاسپورٹ اور ڈیجیٹل سسٹم وقت کی ضرورت ہے۔

تفصیلات کے مطابق میرخلیل الرحمٰن میموریل سوسائٹی کے زیرِ اہتمام لاہور میں ڈیجیٹل ویکسی نیشن پاسپورٹ کے موضوع پر سیمینار ہوا۔سیمینار سے اپنے خطاب میں ڈاکٹر فیصل سلطان نے ڈیجیٹل ویکسینیشن پاسپورٹ کے حوالے سے گفتگو کرتے ہوئے کہا کہ ڈیجیٹل پاسپورٹ میں نا صرف مسافر بلکہ ویکسین اور پولیو سمیت دیگر ٹیسٹوں کی تمام معلومات موجود ہوں گی۔

انہوں نے ڈیجیٹل سسٹم میں رکاوٹ پر گفتگو کرتے ہوئے یہ بھی کہا کہ ڈیجیٹل سسٹم میں بڑی رکاوٹ یہ ہے کہ بہت سے لوگوں کے پاس قومی شناختی کارڈ ہی نہیں، ڈیجیٹل ویکسین پاسپورٹ مستقبل میں ضروری ہو گا۔یونیورسٹی آف ہیلتھ سائنسز کے وائس چانسلر ڈاکٹر جاوید اکرم کا سیمینار سے خطاب میں کہنا تھا کہ یہ اچھی بات ہے کہ لوگ تیزی سے ویکسین کی طرف جا رہے ہیں۔

انہوں نے یہ بھی کہا کہ ڈیجیٹل پاسپورٹ سے قبل اینٹی باڈیز کے ٹیسٹوں کا اسٹینڈرڈ سیٹ کرنا بہت ضروری ہے۔دیگر مقررین کا کہنا تھا کہ عوام کے تعاون کے بغیر کوئی بھی اقدام کامیاب نہیں ہو سکتا۔