بلجیم میں دو اسرائیلی فوجی جنگی جرائم کے الزام میں گرفتار

?️ 22 جولائی 2025

بلجیم میں دو اسرائیلی فوجی جنگی جرائم کے الزام میں گرفتار، تفتیش جاری

ذرائع ابلاغ کی رپورٹ کے مطابق بلجیم کے حکام نے اعلان کیا ہے کہ دو صہیونی فوجیوں کو، جو شمالی شہر آنتورپ میں منعقدہ عالمی میوزک فیسٹیول ٹومارو لینڈ”میں شریک تھے، غزہ میں جنگی جرائم کے الزامات کی بنیاد پر مختصر طور پر حراست میں لیا گیا اور ان سے تفتیش کی گئی ہے۔

برطانوی اخبار گارڈین کے مطابق، فلسطینی حامی تنظیم بنیاد هند رجب (HRF) نے ان دو اسرائیلی فوجیوں کی شناخت کی، جنہیں غزہ میں بین الاقوامی انسانی حقوق کی سنگین خلاف ورزیوں کا مرتکب قرار دیا گیا۔ اس تنظیم نے عالمی قانونی کارروائی نیٹ ورک نامی انسانی حقوق کے ماہر وکلاء کے گروپ کے ساتھ مل کر ان فوجیوں کے خلاف مقدمہ دائر کیا۔

بلجیم کے وفاقی استغاثہ کے دفتر نے بتایا کہ ان شکایات کی بنیاد پر ان فوجیوں کو شناخت کر کے ان سے پوچھ گچھ کی گئی۔ دفتر کا کہنا تھا کہ بلجیم کی عدالتوں کو بین الاقوامی جنگی جرائم سے متعلق مقدمات پر سرحد پار دائرہ اختیار حاصل ہے، جس کے تحت یہ کارروائی کی گئی۔ تاہم، ابتدائی تحقیقات کے پیش نظر مزید تفصیلات فی الحال جاری نہیں کی جائیں گی۔

یہ دونوں صہیونی فوجی گزشتہ ہفتے آنتورپ میں ہونے والے معروف فیسٹیول میں شریک تھے، جہاں فلسطین حامی کارکنان نے ان کی شناخت کی۔ حکام کے مطابق ان فوجیوں کے نام فی الحال صیغۂ راز میں رکھے گئے ہیں۔

ادھر، حالیہ دنوں میں بلجیم کے بادشاہ نے غزہ میں جاری انسانی بحران پر یورپ کی خاموشی پر شدید تنقید کرتے ہوئے کہا ہے کہ یورپ کو اس تباہی کے حل میں ایک مؤثر اور فعال کردار ادا کرنا چاہیے۔ انہوں نے کہا کہ موجودہ صورت حال "بشر دوستی کے نام پر ایک شرمناک باب” بن چکی ہے۔

یاد رہے کہ بلجیم میں دو اسرائیلی فوجی، جو غزہ میں مبینہ جنگی جرائم میں ملوث تھے، ایک فیسٹیول میں شناخت ہونے کے بعد مختصر طور پر گرفتار کر لیے گئے۔ فلسطینی حامی تنظیموں نے ان کے خلاف قانونی کارروائی کی درخواست دی ہے، اور بلجیم نے بین الاقوامی قانون کے تحت ان سے تفتیش کی اجازت دی ہے۔