امریکی فوجی کارروائیاں وحشیانہ قتل ہیں: وینزویلا کے وزیر خارجہ

سچ خبریں:  وینزویلا کے وزیر خارجہ ایوان گیل پنٹو نے بین الاقوامی قانون کے دفاع میں قانون دانوں کے اجلاس سے خطاب کرتے ہوئے کہا کہ اس وقت بین الاقوامی قانون کے تمام اصول، جیسا کہ ہم انہیں جانتے ہیں، پامال کر دیے گئے ہیں۔

انہوں نے امریکہ کی فوجی کارروائیوں کو وحشیانہ قتل قرار دیتے ہوئے مزید کہا کہ ان حملوں کے متاثرین کے خلاف کوئی جرم ثابت نہیں ہوا ہے۔

انہوں نے اس بات پر زور دیا کہ بحری جہازوں پر حملوں کے مرتکبین کے خلاف فوجداری ذمہ داری عائد ہوتی ہے۔ ان کا کہنا تھا کہ کیریبین سمندر میں بحری جہازوں پر امریکی حملے نہ صرف وینزویلا بلکہ پوری انسانیت اور اقوام متحدہ کے نظام کے لیے بھی خطرہ ہیں۔

وزیر خارجہ نے امریکہ کے ساتھ کسی بھی قسم کے دوطرفہ تنازعے سے انکار کرتے ہوئے واضح کیا کہ ہمارا امریکہ سے کوئی تنازعہ نہیں ہے۔ ہم ایک آزاد اور خود مختار ملک ہیں جو ایک ایٹمی طاقت کی یکطرفہ جارحیت کے خلاف اپنا دفاع کر رہے ہیں۔

انہوں نے وینزویلا کے خلاف امریکی کارروائیوں کو ایک آزاد قوم کے دباؤ اور اس کے وسائل کی لوٹ مار کی کوشش قرار دیا۔ انہوں نے کہا کہ ہم اقوام متحدہ میں سیاسی، دفاعی، انسانی حقوق اور قانونی اقدامات اٹھائیں گے۔