امریکہ طالبان پر اپنے مطالبات مسلط کرنے کی کوشش کر رہا ہے: روس

🗓️ 22 دسمبر 2021

سچ خبریں:روس کے نائب وزیر خارجہ اولیگ سیرومولوٹوف نے کہا کہ امریکہ مالی ذرائع سے طالبان پر اپنے مطالبات مسلط کرنے کی کوشش کر رہا ہے۔
ریانووستی کی رپورٹ کے مطابق روسی نائب وزیر خارجہ سیرومولوٹوف نے بدھ کو ہونے والے ایک سیاسی اجلاس میں کہاکہ بدقسمتی سےامریکہ اور اس کے اتحادیوں کے اقدامات افغانستان کی صورت حال کو مزید خراب کریں گے، انہوں نے افغانستان میں مغربی ممالک کے اقدامات اور پالیسیوں پر تنقید کرتے ہوئے مزید کہاکہ اپنی غلطیوں کو تسلیم کرنے اور اپنے غلط مؤقف سے پیچھے ہٹنے کے بجائے، ان ممالک نے اپنے مقاصد اور مطالبات کو آگے بڑھانے کے لیے طالبان کے مالی ذرائع کا سہارا لیا۔

روس کے نائب وزیر خارجہ نے کہا کہ افغانستان میں دہشت گردی اور منشیات کی اسمگلنگ کے خلاف ٹارگٹڈ انداز میں جنگ (مغرب اور امریکہ کی طرف سے) ثانوی اہمیت کی حامل ہے، سیرومولوٹوف نے کہا کہ اس غیر تعمیری نقطہ نظر کے برعکس، روس اور اس کے شراکت دار اقوام متحدہ کے چارٹر اور سلامتی کونسل کی قراردادوں نیز انسداد دہشت گردی کنونشن کے اصولوں کی بنیاد پر انسداد دہشت گردی کے میدان میں شفاف مذاکرات کو مضبوط بنانے کی پالیسی پر مسلسل عمل پیرا ہیں۔

سینئر روسی سفارت کار نے کہا کہ دہشت گرد تنظیمیں افغانستان میں طالبان کے عروج کو انتہا پسندی کی فتح سمجھتی ہیں اور القاعدہ اس صورتحال سے فائدہ اٹھانا چاہتی ہے۔