اسرائیلی وزیرِ خارجہ کی ثالث ممالک سے قیدیوں کی لاشوں کی واپسی میں مدد کی درخواست

اسرائیلی وزیرِ خارجہ کی ثالث ممالک سے قیدیوں کی لاشوں کی واپسی میں مدد کی درخواست

اسرائیلی وزیرِ خارجہ گدعون ساعر نے غزہ میں موجود اسرائیلی قیدیوں کی لاشوں کی واپسی کے لیے ثالث ممالک سے مدد کی اپیل کی ہے۔

عرب ٹی وی چینل الجزیرہ مباشر کے مطابق، ساعر نے کہا کہ ہم توقع رکھتے ہیں کہ ثالث ممالک اسرائیلی اسیران کی لاشوں کی بازیابی میں اپنا کردار ادا کریں۔

انہوں نے مزید دعویٰ کیا کہ تل ابیب امریکی صدر ڈونلڈ ٹرمپ کے پیش کردہ امن منصوبے پر عمل پیرا ہے اور کہا خطے میں پائیدار استحکام حاصل کرنے کا واحد راستہ ٹرمپ کے منصوبے پر عمل درآمد ہے، اور ہم چاہتے ہیں کہ یہ منصوبہ کامیاب ہو۔

ساعر نے حماس پر الزام لگایا کہ وہ 19 اسرائیلی اسیران کی لاشوں کو روک کر اس امن منصوبے کی خلاف ورزی کر رہی ہے۔

یاد رہے کہ 13 اکتوبر 2025 کو مصر کے ساحلی شہر شرم الشیخ میں ایک اہم اجلاس منعقد ہوا تھا، جس کی میزبانی مصری صدر عبدالفتاح السیسی اور امریکی صدر ڈونلڈ ٹرمپ نے مشترکہ طور پر کی۔

اس اجلاس میں انگلینڈ، فرانس، جرمنی، نروے، قطر، ترکی، اردن اور فلسطینی خودمختار انتظامیہ سمیت 20 سے زائد ممالک کے رہنما شریک ہوئے۔

ٹرمپ کے پیش کردہ غزہ امن منصوبے پر دستخط کی رسمی تقریب بھی اسی موقع پر منعقد ہوئی۔ اس تقریب میں امریکہ، قطر، مصر اور ترکی کے رہنماؤں نے بطور ثالث شرکت کی، تاہم قابلِ ذکر بات یہ تھی کہ اسرائیل اور حماس، جو اس معاہدے کے فریقِ اول ہیں، تقریب میں موجود نہیں تھے۔

امریکی صدر ڈونلڈ ٹرمپ نے معاہدے پر دستخط کے بعد مصر سے روانہ ہوتے ہوئے کہا تھا کہ یہ اقدام غزہ میں پائیدار امن کی بنیاد ثابت ہوگا۔