اسرائیل غزہ میں نسل کشی کر رہا ہے:ممتاز یہودی نژاد برطانوی مورخ

ممتاز یہودی نژاد برطانوی مورخ اور مؤرخِ مشرقِ وسطیٰ آوی اشلایم نے اعلان کیا ہے کہ وہ اب صہیونیت پر یقین نہیں رکھتے اور اسرائیل کی جانب سے غزہ میں کی جانے والی نسل کشی کے باعث ان کی ہمدردیاں فلسطینی مزاحمتی تحریک حماس کے ساتھ ہیں۔

اسرائیلی اخبار ہاآرتص میں شائع ہونے والے ایک مضمون میں اشلایم نے لکھا کہ فلسطینی عوام جدید تاریخ کی سب سے طویل اور وحشیانہ فوجی قبضے کے تحت زندگی گزار رہے ہیں اور انہیں قابض فوجیوں کے خلاف مزاحمت، حتیٰ کہ مسلح جدوجہد کا بھی حق حاصل ہے۔

انہوں نے واضح کیا کہ عملیات طوفان الاقصیٰ دہائیوں پر محیط صہیونی قبضے کا نتیجہ تھی اور فلسطینی جنگجو اس کارروائی کے ذریعے کوئی جنگی جرم نہیں کر رہے تھے بلکہ اپنے جائز حقوق کے لیے لڑ رہے تھے۔

اشلایم نے اعلانِ بالفور کو ایک استعماری دستاویز قرار دیتے ہوئے کہا کہ اس نے فلسطین کی 90 فیصد مقامی آبادی کے حقوق کو نظرانداز کیا اور یہ برطانیہ کی ایک بڑی اسٹریٹجک غلطی تھی۔

ان کا کہنا تھا کہ اسرائیل حماس کو دہشت گرد تنظیم قرار دے کر اصل مسئلہ یعنی قبضے کو چھپانے کی کوشش کرتا ہے، حالانکہ حماس فلسطینی سماج کا ایک حصہ ہے اور مسئلہ فلسطین کا کوئی بھی حل اس تحریک کو نظرانداز کرکے ممکن نہیں۔

انہوں نے مزید کہا کہ اسرائیل ایک استعماری اور نسل پرستانہ نظام کے طور پر کام کرتا ہے جس میں بدترین آپارتھائیڈ مسلط ہے، جبکہ نیتن یاہو کی موجودہ کابینہ تاریخ کی سب سے زیادہ دائیں بازو کی اور متعصب حکومت ہے جو واضح طور پر نسلی تطہیر کی پالیسی پر عمل پیرا ہے۔

اشلایم کے مطابق، وہ لمحہ جس نے ان کے خیالات کو بنیادی طور پر بدل دیا، اسرائیل کی جانب سے غزہ میں جاری نئی نسل کشی تھی۔ انہوں نے اسرائیل کو غزہ میں بھوک کو بطور ہتھیار استعمال کرنے اور انسانی امداد روکنے کا مرتکب قرار دیا اور کہا اگر یہ نسل کشی نہیں تو پھر کیا ہے؟

یہودی نژاد اس برطانوی مورخ نے اپنی تازہ تحریر میں کہا ہے کہ دنیا اب اس حقیقت کو نظرانداز نہیں کر سکتی۔