اسرائیل جھوٹ پھیلا رہا ہے:غزہ سرکاری دفتر

 اسرائیل جھوٹ پھیلا رہا ہے:غزہ سرکاری دفتر

 غزہ کے سرکاری اطلاعاتی دفتر نے کہا ہے کہ اسرائیل جھوٹی خبریں بنا کر دنیا کو دھوکا دے رہا ہے، جبکہ پچھلے 12 گھنٹوں میں اسرائیلی حملوں میں 109 فلسطینی شہید ہوئے ہیں جن میں 52 بچے اور 23 خواتین شامل ہیں۔

بیان میں کہا گیا ہے کہ اسرائیل نے 26 ناموں کی ایک فہرست جاری کی ہے اور دعویٰ کیا ہے کہ یہ لوگ حالیہ لڑائی میں مارے گئے ہیں، لیکن اس فہرست میں کچھ غلط اور فرضی نام شامل ہیں جو فلسطینی ریکارڈ میں موجود ہی نہیں۔

غزہ کے حکام کے مطابق، فہرست میں چار ایسے افراد کے نام بھی ہیں جو زندہ ہیں اور حملوں کے وقت وہاں موجود بھی نہیں تھے۔ کچھ نام دو بار لکھے گئے ہیں تاکہ لوگوں کو گمراہ کیا جا سکے۔دفتر نے اسرائیل پر الزام لگایا کہ وہ جھوٹی معلومات پھیلا کر اپنی بمباری اور شہریوں کے قتل کو چھپانا چاہتا ہے۔

غزہ کی حکومت نے عالمی برادری، اقوامِ متحدہ اور سلامتی کونسل سے مطالبہ کیا ہے کہ وہ اسرائیل کو جنگ بندی پر عمل کرنے اور نہتے شہریوں پر حملے روکنے پر مجبور کریں۔

یاد رہے کہ منگل کی رات اسرائیلی طیاروں نے پھر سے غزہ کے مختلف علاقوں پر بمباری کی تھی، جس میں 100 سے زیادہ فلسطینی شہید اور درجنوں زخمی ہوئے۔ فلسطینی وزارتِ صحت کے مطابق یہ حملے موجودہ جنگ بندی کی خلاف ورزی ہیں۔