اسرائیل کو کبھی تسلیم نہیں کریں گے:وفاقی وزیر 

سچ خبریں:پاکستان کے امور مذہبی کے وزیر سردار محمد یوسف نے دوٹوک موقف اپناتے ہوئے کہا کہ اسرائیل ناجائز ریاست ہے، پاکستان کبھی تسلیم نہیں کرے گا۔ 

پاکستان کے وفاقی وزیر امور مذہبی و بین المذاہب ہم آہنگی سردار محمد یوسف نے ایک بار پھر فلسطینی عوام کی جدوجہد کی بھرپور حمایت کا اعلان کرتے ہوئے کہا ہے کہ اسرائیل ایک ناجائز ریاست ہے اور پاکستان اسے کبھی بھی تسلیم نہیں کرے گا۔

یہ بھی پڑھیں:صیہونی حکومت کے بارے میں پاکستانی وزیر اعظم کا موقف

وزارتِ امورِ مذہبی کے شعبہ تعلقات عامہ کے مطابق، سردار محمد یوسف نے اسلام آباد میں فلسطین کے سفیر سے ملاقات کے دوران کہا کہ پاکستان نے کبھی بھی اسرائیل کی ریاستی حیثیت کو قبول نہیں کیا اور اسے ایک ناجائز ریاست سمجھتا ہے، اس لیے اسے کبھی تسلیم نہیں کیا جائے گا۔

انہوں نے اسرائیلی مظالم اور غزہ کے مظلوم عوام پر مسلسل حملوں کی شدید مذمت کرتے ہوئے کہا کہ پاکستانی عوام اور حکومت ہر محاذ پر فلسطینیوں کے جائز حقِ خودارادیت اور جدوجہدِ آزادی کی حمایت جاری رکھیں گے۔

سردار محمد یوسف نے مسئلہ فلسطین کے حل کے لیے اسلامی تعاون تنظیم (OIC) کے موثر کردار کی ضرورت پر بھی زور دیا اور کہا کہ پاکستان عالمی ضمیر کو جگانے کے لیے اپنی کوششیں جاری رکھے گا تاکہ فلسطینی عوام کو انصاف دلایا جا سکے۔

وزیر امور مذہبی پاکستان نے کہا کہ یہ میری اور پوری پاکستانی قوم کی دیرینہ آرزو ہے کہ ہم بھی مکہ مکرمہ اور مدینہ منورہ کی طرح مسجد الاقصیٰ، جو مسلمانوں کا پہلا قبلہ ہے، میں نماز ادا کریں۔

اس ملاقات کے دوران اسلام آباد میں تعینات فلسطینی سفیر زهیر محمد حمداللہ نے بتایا کہ فلسطینی صدر کے مشیر اور مسجد الاقصیٰ کے امام جلد پاکستان کا دورہ کریں گے۔

مزید پڑھیں:اسرائیل فلسطینیوں کی نسل کشی کر رہا ہے، اقوام متحدہ سیز فائر کیلئے کردار ادا کرے، دفتر خارجہ

انہوں نے مزید کہا کہ اسرائیل کی ناجائز قبضے کے باوجود فلسطینی قوم اپنی سرزمین کی آزادی کے لیے کسی بھی قربانی سے دریغ نہیں کرے گی۔