لبنان اسرائیل معاہدے کے خلاف ہزاروں لبنانیوں کا بیروت میں احتجاج

?️ 27 جون 2026

سچ خبریں:ہزاروں لبنانی شہریوں نے بیروت اور دیگر علاقوں میں اسرائیل کے ساتھ ہونے والے معاہدے کے خلاف سڑکوں پر نکل کر شدید احتجاج کیا ہے۔

فلسطینی خبر رساں ایجنسی شهاب کی رپورٹ لبنان کے دارالحکومت بیروت میں اسرائیل کے ساتھ فریم ورک معاہدے کے خلاف ہزاروں افراد نے احتجاجی مظاہرے کیے، شہریوں نے اسے نارملائزیشن کی کوشش قرار دیتے ہوئے حکومت، امریکہ اور اسرائیل کے معاہدے کی شدید مخالفت کی۔

رپورٹ کے مطابق بیروت کے جنوبی علاقے ضاحیہ کی سڑکوں پر مظاہرے شروع ہوئے، جہاں شہریوں نے اسرائیل کے ساتھ ہونے والے فریم ورک معاہدے کی مخالفت کی جسے وہ دونوں ممالک کے درمیان تعلقات کو معمول پر لانے کی کوشش قرار دیتے ہیں۔

رپورٹ کے مطابق لبنانی مظاہرین نے حکومتِ لبنان کے امریکہ اور اسرائیل کے ساتھ کیے گئے معاہدے کی سخت مذمت کی اور اسے قومی خودمختاری کے خلاف قرار دیا۔

یہ احتجاج اس وقت سامنے آیا جب لبنانی پارلیمنٹ میں وفاداری برائے مزاحمت دھڑے کے رکن حسن فضل اللہ نے کہا کہ اسرائیل کے ساتھ براہ راست مذاکرات لبنان کے آئین کے آرٹیکل 52 کے منافی ہیں اور کسی کو یہ حق حاصل نہیں کہ وہ اسرائیل کے ساتھ دشمنی کی حیثیت کو ختم کرے۔