امریکہ وینزوئلا کے ساتھ مسلسل جنگ میں مصروف ہے: امریکی سینیٹر

?️ 19 جنوری 2026

سچ خبریں:امریکی سینیٹر رینڈ پال نے کہا ہے کہ امریکہ وینزوئلا کے ساتھ ایک مسلسل جنگ میں ملوث ہے،ان کے مطابق وینزوئلا کے تیل کی ضبطی اور بحری ناکہ بندی جنگی اقدام کے مترادف ہے۔

امریکی ریاست کینٹکی سے تعلق رکھنے والے ریپبلکن سینیٹر رینڈ پال نے کہا ہے کہ ریاستہائے متحدہ امریکہ وینزوئلا کے ساتھ ایک مسلسل جنگ میں مصروف ہے۔

یہ بھی پڑھیں:وینزویلا کے خلاف ٹرمپ کی پیشگی منصوبہ بند جارحیت پر ردِعمل کیا ہونا چاہیے؟

امریکی ویب سائٹ دی ہِل کے مطابق، اس امریکی سیاستدان نے این بی سی نیٹ ورک سے گفتگو کرتے ہوئے کہا کہ یہ ایک جنگی اقدام ہے، یہ ایک مسلسل جنگ ہے، ان کے تیل پر قبضہ جاری رکھنا اور اسے تقسیم کرنا بھی ایک مسلسل جنگ ہے۔

انہوں نے کہا کہ اگرچہ وہ اب بھی امید رکھتے ہیں کہ حالات بہترین سمت میں جائیں گے، تاہم امریکہ اب بھی وینزوئلا کے ساتھ ایک فعال جنگ میں الجھا ہوا ہے،رینڈ پال نے نشاندہی کی کہ ابھی بھی ہمارے پاس سینکڑوں جہاز موجود ہیں جو وینزوئلا کے ساحل کا سو فیصد محاصرہ کیے ہوئے ہیں۔

یہ بیانات ایسے وقت میں سامنے آئے ہیں جب دو ہفتے قبل ڈونلڈ ٹرمپ کی حکومت نے ایک وینزویلی تیل بردار جہاز ضبط کیا اور اعلان کیا کہ وینزوئلا 30 سے 50 ملین بیرل تیل امریکہ کے حوالے کرے گا۔ یہ اقدام وینزوئلا کے صدر نکولس مادورو کو اغوا کیے جانے کے بعد کیا گیا۔

ٹرمپ نے اس سے قبل سوشل میڈیا پر لکھا تھا کہ یہ تیل مارکیٹ ریٹ پر فروخت کیا جائے گا اور اس رقم کو بطور امریکی صدر وہ خود کنٹرول کریں گے، تاکہ یہ یقینی بنایا جا سکے کہ اسے وینزوئلا اور امریکہ کے عوام کے مفاد میں استعمال کیا جائے۔

امریکی صدر نے نیویارک ٹائمز کو یہ بھی بتایا کہ امریکہ وینزوئلا کی انتظامیہ کو چند مہینوں نہیں بلکہ کافی طویل مدت تک جاری رکھے گا۔

3 جنوری کی صبح وینزوئلا کے دارالحکومت کاراکاس اور ریاستوں میراندا، آراگوا اور لا گوایرا میں امریکی افواج کے حملے ہوئے، جن کے نتیجے میں متعدد شہری جاں بحق ہوئے۔ اس حملے کے کچھ عرصے بعد ٹرمپ نے مادورو اور ان کی اہلیہ کے اغوا کی خبر دی۔

امریکی حملے کے دو دن بعد، مادورو اور ان کی اہلیہ کو نیویارک منتقل کیا گیا، جہاں وہ مین ہٹن کی وفاقی عدالت میں پیش ہوئے تاکہ ٹرمپ حکومت کی وزارتِ انصاف کی جانب سے دائر فردِ جرم کے تحت ان پر مقدمہ چلایا جا سکے۔

مزید پڑھیں:ٹرمپ: وینزویلا میں امریکی تیل کمپنیوں کے اخراجات کی تلافی کی جائے گی

مادورو نے امریکہ کی وزارتِ انصاف کی جانب سے منشیات کی اسمگلنگ سے متعلق لگائے گئے الزامات کو مسترد کرتے ہوئے کہا کہ وہ بدستور وینزوئلا کے صدر ہیں اور انہیں ان کے گھر سے اغوا کیا گیا تھا۔