شہبازشریف کا بانی پی ٹی آئی کیخلاف ہرجانے کا دعویٰ، عطاء تارڑ بطور گواہ پیش

?️ 4 نومبر 2025

اسلام آباد (سچ خبریں) سیشن کورٹ لاہور میں وزیراعظم شہباز شریف کے بانی پی ٹی آئی کے خلاف 10 ارب روپے ہرجانے کے مقدمے کی سماعت ہوئی، ایڈیشنل سیشن جج یلماز غنی نے کیس کی سماعت کی، وفاقی وزیر اطلاعات عطاء اللہ تارڑ بطور گواہ عدالت میں پیش ہوئے اور اپنا بیانِ حلفی قلمبند کرایا۔

عطاء تارڑ نے بیان دیتے ہوئے کہا ہے کہ بانی پی ٹی آئی نے شہباز شریف پر جھوٹے اور بے بنیاد الزامات لگائے جن سے ان کی شہرت کو قومی اور بین الاقوامی سطح پر نقصان پہنچا۔ ان کے مطابق بانی پی ٹی آئی نے پانامہ کیس کے دوران رشوت کی پیشکش کے الزامات مختلف ٹی وی پروگرامز اور عوامی اجتماعات میں بار بار دہرائے، جو بدنیتی پر مبنی تھے۔

عدالت کے استفسار پر عطا تارڑ نے شہباز شریف کے سیاسی کیریئر اور انتخابی کامیابیوں کا تفصیلی حوالہ دیا، جبکہ الیکشن کمیشن کے گزٹڈ نوٹیفکیشنز بھی بطور شواہد پیش کیے۔ عدالت نے بعض دستاویزات پر اعتراضات کے باوجود انہیں جمع کروانے کی اجازت دی، بانی پی ٹی آئی کے وکیل کی غیر حاضری پر عدالت نے سماعت ملتوی کرتے ہوئے عطاء تارڑ کو جرح کے لیے 15 نومبر کو طلب کرلیا۔

سماعت کے بعد میڈیا سے گفتگو میں وفاقی وزیر اطلاعات عطاء اللہ تارڑ نے کہا کہ ستائیسویں آئینی ترمیم پر مشاورت جاری ہے، ہم آئینی بنچ سے آئینی عدالت کی طرف بڑھ رہے ہیں۔ انہوں نے کہا کہ ترمیم کا مقصد عدلیہ کو مضبوط بنانا ہے جبکہ بلدیاتی انتخابات پہلے بھی غیر جماعتی بنیادوں پر ہوتے رہے ہیں اور اب بھی وقت پر ہونے چاہییں۔

عطا تارڑ نے مزید کہا کہ بانی پی ٹی آئی کے وکیل 120 سماعتوں میں التواء لے چکے ہیں، مگر اب یہ کیس اپنے حتمی مرحلے میں داخل ہو چکا ہے، ملک میں مہنگائی کی شرح میں واضح کمی آئی ہے اور وزیراعظم شہباز شریف کی قیادت میں پاکستان ایک بار پھر ترقی کی راہ پر گامزن ہے۔