یورپ میں کاروان صمود پر صیہونی حملے کے خلاف شدید احتجاج

?️ 19 مئی 2026

سچ خبریں:روم، ایتھنز اور دیگر یورپی شہروں میں ہزاروں افراد نے کاروان صمود پر صیہونی حملے کے خلاف سڑکوں پر نکل کر اسرائیل کے خلاف شدید نعرے بازی کی۔ مظاہرین نے غزہ کا محاصرہ ختم کرنے اور گرفتار کارکنوں کی فوری رہائی کا مطالبہ کیا ہے۔

غزہ کا محاصرہ توڑنے اور انسانی ہمدردی کی بنیاد پر امداد پہنچانے والے بین الاقوامی کاروان صمود  پر صیہونی فورسز کے حملے کے خلاف یورپ بھر میں غم و غصے کی لہر دوڑ گئی ہے۔ اٹلی اور یونان کے بڑے شہروں میں ہزاروں افراد نے احتجاجی مظاہرے کیے اور اسرائیل کی جارحیت کو مسترد کر دیا۔

اٹلی میں عوامی احتجاج

روم اور دیگر اطالوی شہروں جیسے میلان، نیپلس اور ٹورن میں ہزاروں افراد نے ہم سب کچھ روک دیں گے ،کے نعرے کے تحت سڑکوں پر مارچ کیا۔ یہ احتجاج نہ صرف کاروان صمود کی حمایت میں تھا بلکہ اس میں:

  بڑھتی ہوئی مہنگائی اور زندگی کے اخراجات میں اضافے کے خلاف آواز اٹھائی گئی۔

  صحت اور تعلیم کے بجائے فوجی اخراجات میں اضافے کی شدید مذمت کی گئی۔

   اطالوی حکومت سے مطالبہ کیا گیا کہ وہ اسرائیل کے ساتھ تعاون بند کرے اور فلسطینی عوام سے اظہار یکجہتی کرے۔

ایتھنز میں مظاہرہ

یونان کے دارالحکومت ایتھنز میں سیکڑوں مظاہرین نے وزارت خارجہ کے سامنے جمع ہو کر صیہونی بحریہ کی جانب سے کاروان صمود کی کشتیوں پر حملے کی مذمت کی۔ مظاہرین نے فلسطین کے جھنڈے اٹھا رکھے تھے اور فلسطین سے ہاتھ ہٹاؤ کے نعرے لگائے، جبکہ گرفتار کارکنوں کی فوری رہائی کا پرزور مطالبہ کیا۔

کاروان صمود کو درپیش خطرات

یاد رہے کہ کاروان صمود کے منتظمین نے خبردار کیا ہے کہ صیہونی بحریہ نے پہلے ہی اس کاروان پر فوجی حملے اور کشتیوں کو قبضے میں لینے کی دھمکی دی تھی،راستے میں مشکوک کشتیوں کی نقل و حرکت نے اس کاروان کی حفاظت کے حوالے سے خدشات کو مزید بڑھا دیا ہے۔

عالمی برادری کی خاموشی کے باوجود، یورپ کے عوام کا یہ احتجاج ظاہر کرتا ہے کہ غزہ کے محصورین کے لیے انسانی ہمدردی کی لہر اب ایک عوامی تحریک کی شکل اختیار کر چکی ہے، جس کے سامنے اسرائیل کی عسکری دھمکیاں بے اثر ہو رہی ہیں۔