جنوب مغربی شام اسلحے سے پاک ہونا چاہیے:نیتن یاہو

سچ خبریں:صیہونی وزیراعظم نیتن یاہو نے شام کے جنوب مغربی علاقے کو اسلحے سے پاک کرنے کی مہم کو جائز قرار دیتے ہوئے دروزی اقلیت کی حمایت کا دعویٰ کیا،اسرائیلی وزیر خارجہ اور امریکی نمائندہ بھی شام میں دروزی عوام کے بہانے مداخلت کا اشارہ دے رہے ہیں۔

الجزیرہ نیوز چینل کی رپورٹ کے مطابق صیہونی وزیراعظم بنیامین نیتن یاہو نے ایک بار پھر شام کے اندرونی معاملات میں مداخلت کا جواز پیش کرتے ہوئے دعویٰ کیا ہے کہ جنوب مغربی شام کو اسلحے سے مکمل طور پر پاک کیا جانا ضروری ہے تاکہ اسرائیل کی سرحدیں محفوظ رہیں۔

یہ بھی پڑھیں:صیہونی جنرل: فوج شام کے اندر اسٹریٹجک پوائنٹس پر موجود ہے

رپورٹ کے مطابق، نیتن یاہو نے آج صبح شامی سرزمین میں صیہونی کارروائیوں کا دفاع کرتے ہوئے کہا کہ تل ابیب اس بات کا پابند ہے کہ شام کے اس حصے میں کسی قسم کا اسلحہ موجود نہ ہو، کیونکہ یہ علاقہ مقبوضہ فلسطین سے متصل ہے۔

انہوں نے مزید دعویٰ کیا کہ ہم شام کو دوسرا لبنان نہیں بننے دیں گے — ایک ایسا بیان جو حزب اللہ کی موجودگی اور اثرورسوخ کے خدشے کی عکاسی کرتا ہے۔

نیتن یاہو نے شام میں دروزی اقلیت کے لیے اپنی حمایت کا اعادہ کرتے ہوئے امید ظاہر کی کہ اسرائیل کو شام میں مزید کارروائیاں کرنے پر مجبور نہ ہونا پڑے۔ ان کے مطابق، یہ سب کچھ دمشق کے طرزِ عمل پر منحصر ہے۔

دوسری جانب، اسرائیلی چینل 12 کی رپورٹ کے مطابق، صہیونی وزیر خارجہ جدعون ساعر نے فرانسیسی ہم منصب کو خبردار کیا ہے کہ اگر شامی حکومت دروزی برادری پر دباؤ جاری رکھتی ہے تو اسرائیل براہ راست مداخلت کرے گا۔

اسی سیاق میں، امریکہ کے خصوصی ایلچی برائے شام نے السویداء میں جاری کشیدگی پر تشویش کا اظہار کرتے ہوئے دعویٰ کیا ہے کہ وہ ایک ایسا حل تلاش کرنا چاہتے ہیں جو دروزی اقلیت، قبائل، شامی حکومت اور اسرائیل کے مفادات کا تحفظ کرے۔

مزید پڑھیں:شامیوں کو امریکی زہریلی رشوت / کاغذ پر نیا مشرق وسطیٰ

انہوں نے مزید کہا کہ امریکہ شام کے تمام فریقین کے ساتھ مل کر موجودہ بحران کا پرامن حل تلاش کرنے کی کوشش کر رہا ہے۔