اگر وحشی اسرائیل کو نہ روکا گیا تو خطہ اور دنیا شعلوں کی نذر ہو جائے گی:ترک صدر

سچ خبریں:ترک صدر رجب طیب اردوغان نے اسرائیل کو دہشتگرد ریاست قرار دیتے ہوئے خبردار کیا کہ اگر اس کی جارحیت فوری طور پر نہ روکی گئی تو یہ خطے اور پوری دنیا کو جنگ اور بربادی میں جھونک دے گا۔ انہوں نے شام کی سرزمینی سالمیت کی حمایت کا بھی اعادہ کیا۔

ترک سرکاری خبررساں ایجنسی اناطولی کی رپورٹ کے مطابق ترکی کے صدر رجب طیب اردوغان نے اسرائیل کو وحشی ریاست اور دہشتگرد حکومت قرار دیتے ہوئے شدید الفاظ میں مذمت کی ہے اور خبردار کیا ہے کہ اگر اسے فوری طور پر نہ روکا گیا تو یہ ریاست نہ صرف خطے بلکہ پوری دنیا کو آگ میں جھونکنے میں کوئی ہچکچاہٹ محسوس نہیں کرے گی۔

یہ بھی پڑھیں:صیہونی جنرل: فوج شام کے اندر اسٹریٹجک پوائنٹس پر موجود ہے

رپورٹ کے مطابق اردوغان نے کابینہ کے اجلاس کے بعد صدارتی محل انقرہ میں ایک نشری تقریر کے دوران کہا کہ میں ایک بار پھر پوری وضاحت سے کہنا چاہتا ہوں کہ اسرائیل ایک ایسی دہشتگرد ریاست ہے جو نہ کسی قانون کو تسلیم کرتی ہے، نہ کسی اصول کی پابند ہے، یہ ریاست بدمعاشی اور درندگی کی علامت بن چکی ہے۔

انہوں نے کہا کہ اسرائیل اپنی تمام تر قوت کے ساتھ علاقے کو خونریزی، انتشار اور بدامنی میں غرق کرنے کی کوشش کر رہا ہے۔

اردوغان نے اسرائیل کے خلاف جارحانہ اقدامات کی تفصیل دیتے ہوئے کہا کہ اسرائیل نے لبنان، یمن اور ایران پر حملے کیے ہیں، بے گناہ عوام کو قتل کیا ہے اور غیر فوجی علاقوں کو بمباری کا نشانہ بنایا ہے، گویا یہ سب کافی نہ تھا، اب حالیہ دو دنوں میں اسرائیل نے ہمارے ہمسایہ ملک شام پر بھی حملہ کرنے کے لیے دروزیوں کو بہانہ بنایا ہے۔

انہوں نے زور دے کر کہا کہ اسرائیلی تجاوزات اس وقت خطے کا سب سے بڑا مسئلہ ہیں اور اگر یہ وحشی روکا نہ گیا تو وہ پوری دنیا کو تباہی کے دہانے پر لے آئے گا۔

اردوغان نے شام سے متعلق ترکی کی پالیسی واضح کرتے ہوئے کہا کہ ہم تمام ممکنہ حالات سے نمٹنے کے لیے تیاریاں کر رہے ہیں۔ میں ایک بار پھر واضح کرتا ہوں کہ شام کی زمینی سالمیت، قومی وحدت، جغرافیائی ہم آہنگی اور اس کی کثیرالثقافتی شناخت کا تحفظ ہماری بنیادی پالیسی ہے۔

ہم کل بھی شام کی تقسیم کے خلاف تھے، آج بھی ہیں، اور کل بھی رہیں گے۔ جو لوگ شمالی اور جنوبی شام کے درمیان ایک راہداری کے خواب دیکھ رہے ہیں، ان کے خواب ان شاءاللہ کبھی پورے نہیں ہوں گے، ہم اپنے شامی بھائیوں کے ساتھ ایسا ہرگز نہیں ہونے دیں گے۔

انہوں نے مزید کہا کہ جو لوگ اسرائیل کے رسّے کو تھام رہے ہیں، وہ جلد یا بدیر جان لیں گے کہ وہ کتنی بڑی غلط فہمی میں مبتلا ہیں۔ ہماری سب سے بڑی خواہش یہ ہے کہ شام کے تمام فرقےچاہے عرب ہوں یا ترکمن، کرد ہوں یا مسیحی، سنی ہوں یا علوی یا دروزیسب مل کر امن و سکون سے رہیں۔

مزید پڑھیں:شامیوں کو امریکی زہریلی رشوت / کاغذ پر نیا مشرق وسطیٰ

آخر میں اردوغان نے شام میں موجودہ حکومت کی حمایت کا اظہار کرتے ہوئے دعویٰ کیا کہ وہ احمد الشرع کی قیادت میں درپیش مشکلات پر قابو پانے میں کامیاب ہوں گے۔