بیروت (سچ خبریں) لبنانی تنظیم حزب اللہ کے سکریٹری جنرل سید حسن نصراللہ کی صحت کے بارے میں غلط افواہوں پر حزب اللہ نے اہم بیان جاری کرتے ہوئے کہا ہے کہ وہ بالکل صحیح و سالم ہیں اور مکمل طور پر صحتیاب ہیں۔
تفصیلات کے مطابق لبنانی تنظیم حزب اللہ کے ڈپٹی سکریٹری جنرل نے سید حسن نصراللہ کی صحت کے بارے اہم تفصیلات بیان کرتے ہوئے ان تمام افاہوں کو مسترد کردیا ہے جن میں کہا گیا تھا کہ انہیں کورونا وائرس ہوگیا ہے۔
غیر ملکی خبررساں ایجنسی کے مطابق، لبنان میں حزب اللہ کے ڈپٹی سکریٹری جنرل، نعیم قاسم نے ایک ٹیلی وی انٹرویو میں کہا ہے کہ حزب اللہ کے سکریٹری جنرل، سید حسن نصراللہ کی صحت بالکل ٹھیک ہے اور وہ مکمل طور پر صحتیاب ہیں۔
انہوں نے مزید تفصیلات بتاتے ہوئے کہا کہ حالیہ دنوں میں سید حسن نصراللہ کی صحت تھوڑی خراب ہوگئی تھی جس کے بعد انہیں آرام کی ضرورت پڑی تھی لیکن اب وہ بالکل صحتیاب ہیں۔
نعیم قاسم نے مزید کہا کہ سید حسن نصراللہ گذشتہ کچھ دنوں نے تھوڑے بیمار تھے اور انہیں صحت یاب ہونے میں دو سے تین دن درکار تھے لیکن کیونکہ ان کے چاہنے والے ان کی تقریر کا بے صبری سے انتظار کررہے تھے اور اگر وہ یہ تقریر نہ کرتے اور عوام کے سامنے نہ آتے تو بہت سارے شبہات اور سوالات پیدا ہوتے، لہٰذا انہوں نے اصرار کیا کہ وہ تقریر کریں گے تاکہ ان کے چاہنے والے جو ان کے منتظر ہیں وہ ناامید نہ ہوں۔
واضح رہے کہ اس سے قبل، اسرائیلی سیکیورٹی اور فوجی عہدے داروں نے دعوی کیا تھا کہ سید حسن نصراللہ کو کورونا وائرس ہوگیا ہے کیونکہ وہ حالیہ تقریر کے دوران کھانسی کررہے تھے، اسرائیل کے اس جھوٹے دعوے کے بعد اب حزب اللہ کی جانب سے یہ بیان سامنے آگیا ہے جس میں اسرائیلی دعوے اور سازش کو بے نقاب کردیا گیا ہے۔
