حزب اللہ کے ڈرون حملوں نے صیہونی دفاعی نظام کی کمزوریاں بے نقاب کر دیں: نیویارک ٹائمز

?️ 5 جون 2026

سچ خبریں:نیویارک ٹائمز کے مطابق حزب اللہ کے فائبر آپٹک ڈرون حملوں نے صیہونی دفاعی نظام کی کمزوریوں کو واضح کر دیا ہے۔ رپورٹ میں کہا گیا ہے کہ ان حملوں کے باعث صیہونی فوج کو مسلسل جانی و مالی نقصان کا سامنا ہے۔

نیویارک ٹائمز نے اپنی ایک رپورٹ میں کہا ہے کہ حزب اللہ کے فائبر آپٹک ڈرون حملوں نے صیہونی دفاعی نظام کی کمزوریاں بے نقاب کر دی ہیں۔

الجزیرہ نیوز چینل کی رپورٹ کے مطابق نیویارک ٹائمز میں شائع ہونے والی اس رپورٹ میں بتایا گیا ہے کہ حالیہ ہفتوں کے دوران یہ ڈرون حملے صہیونی حکومت کے بکتر بند گاڑیوں، ٹینکوں اور فضائی دفاعی نظام کے خلاف براہ راست کارروائیوں میں استعمال کیے گئے ہیں۔ صیہونی فوج نے بھی اس بات کی تصدیق کی ہے کہ یہ حملے تقریباً روزانہ کے معمول میں تبدیل ہو چکے ہیں اور ان کے نتیجے میں متعدد فوجی ہلاک ہو چکے ہیں۔

رپورٹ کے مطابق ان حملوں کے اثرات صرف فوجی نقصان تک محدود نہیں رہے بلکہ انہوں نے صیہونی ٹیکنالوجی برتری کے تصور کو بھی چیلنج کیا ہے، جس سے جنوبی لبنان میں تعینات صیہونی فوجیوں میں تشویش بڑھ گئی ہے۔

نیویارک ٹائمز نے صہیونی حکام کے حوالے سے مزید بتایا ہے کہ فوجی افسران نے ۲۰۲۴ کے آغاز ہی سے اس امکان سے خبردار کیا تھا کہ حزب اللہ فائبر آپٹک ڈرون استعمال کر سکتا ہے۔ یہ وہ ٹیکنالوجی ہے جو روس اور یوکرین کی جنگ کے دوران وسیع پیمانے پر استعمال میں آئی۔

ان ڈرونز کی خاص بات یہ ہے کہ یہ ریڈیو سگنلز پر انحصار نہیں کرتے، بلکہ آپریٹر انہیں باریک فائبر آپٹک کیبل کے ذریعے کنٹرول کرتا ہے جو پرواز کے دوران کھلتی جاتی ہے، جس کے باعث یہ الیکٹرانک جیمنگ اور رکاوٹوں سے بڑی حد تک محفوظ رہتے ہیں۔

تاہم رپورٹ کے مطابق ان وارننگز کے باوجود صیہونی فوج نے اس نئے خطرے سے نمٹنے کے لیے مؤثر اقدامات نہیں کیے۔ حتیٰ کہ اپریل میں حملوں کے آغاز کے بعد بھی وہ سادہ دفاعی تدابیر اختیار نہیں کی گئیں جو یوکرین جنگ میں استعمال ہوئیں، جیسے فوجی گاڑیوں اور ٹھکانوں پر حفاظتی جال لگانا۔

ریٹائرڈ جنرل گائے ہازوت کا کہنا ہے کہ سکیورٹی ادارے اس خطرے سے آگاہ تھے لیکن اسے سنجیدگی سے نہیں لیا گیا۔

نیویارک ٹائمز نے اپنی رپورٹ میں یہ بھی کہا ہے کہ حزب اللہ نے ۲۰۱۴ کے بعد دوبارہ اسرائیل کے خلاف عسکری سرگرمیوں کا آغاز کیا تھا، اور حالیہ عرصے میں خاص طور پر ایران کے خلاف کشیدگی کے دوران اس نے اپنے میزائل اور ڈرون حملوں میں اضافہ کیا ہے۔