نیویارک ٹائمز کی شیطانیوں پر حماس کا رد عمل

سچ خبریں:فلسطینی مزاحمتی تحریک حماس نے امریکی اخبار نیویارک ٹائمز کی جانب سے موسیٰ ابو مرزوق سے منسوب بیانات کو جھوٹا قرار دیتے ہوئے مزاحمت کے ہتھیاروں کے خاتمے پر کسی بھی قسم کے مذاکرات کو مسترد کر دیا ہے۔  

فلسطینی خبر رساں ادارے سما کی رپورٹ کے مطابق، حماس نے ایک بیان جاری کرتے ہوئے کہا ہے کہ نیویارک ٹائمز میں 24 فروری کو شائع ہونے والے موسیٰ ابو مرزوق کے انٹرویو میں دیے گئے بیانات حقیقت پر مبنی نہیں ہیں۔

یہ بھی پڑھیں: فلسطینی مزاحمت کاروں کے حملوں پر صہیونی رپورٹر کی حیرت

حماس نے وضاحت کرتے ہوئے کہا کہ یہ انٹرویو چند روز قبل دیا گیا تھا، مگر اخبار نے مکمل اور اصل جوابات کو توڑ موڑ کر نیز سیاق و سباق سے ہٹ کر پیش کیا۔

بیان میں کہا گیا ہے کہ 7 اکتوبر کا آپریشن (طوفان الاقصی) فلسطینی عوام کے حقِ مزاحمت کا مظہر تھا، جو قبضے اور محاصرے کے خلاف ایک جائز ردعمل تھا۔

موسیٰ ابو مرزوق نے حماس کے مستقل مؤقف کی توثیق کرتے ہوئے واضح کیا کہ فلسطینی عوام کو ہر قسم کی مزاحمت، خاص طور پر مسلح مزاحمت کا حق حاصل ہے۔

انہوں نے کہا کہ مزاحمتی ہتھیار فلسطینی عوام کا حق ہیں اور ان کا واحد مقصد فلسطینیوں اور ان کی اقدار کا دفاع کرنا ہے، جب تک اسرائیلی قبضہ جاری ہے ان ہتھیاروں کو ترک کرنے کا سوال ہی پیدا نہیں ہوتا۔

حماس کے ترجمان حازم قاسم نے بھی نیویارک ٹائمز میں شائع ہونے والے بیانات کو مسترد کرتے ہوئے کہا کہ مزاحمت کے ہتھیار جائز اور ناقابلِ گفت و شنید ہیں، جب تک فلسطینی سرزمین پر قبضہ برقرار ہے، یہ مسئلہ مذاکرات کا حصہ نہیں بنے گا۔

 انہوں نے مزید وضاحت کی کہ نیویارک ٹائمز میں شائع ہونے والا مؤقف حماس کا سرکاری مؤقف نہیں ہے۔

حماس کے ایک اور رہنما اسماعیل رضوان نے کہا کہ مزاحمت کے ہتھیار سرخ لکیر ہیں، اور اسرائیل جنگ بندی معاہدے سے فرار کا راستہ تلاش کر رہا ہے، انہوں نے ثالث ممالک سے اپیل کی کہ وہ قابض قوتوں پر معاہدے پر عمل درآمد کے لیے دباؤ ڈالیں۔

یاد رہے کہ نیویارک ٹائمز نے دعویٰ کیا کہ موسیٰ ابو مرزوق نے کہا تھا کہ حماس کو 7 اکتوبر کے حملے کی پیشگی معلومات نہیں تھیں اور اگر میں جانتا کہ اس کا نتیجہ اتنی تباہی کی صورت میں نکلے گا، تو میں اسے روک دیتا۔

اخبار نے یہ بھی دعویٰ کیا کہ ابو مرزوق نے کہا کہ حماس حملے کی مجموعی حکمتِ عملی سے متفق تھی، مگر اسے تفصیلات کا علم نہیں تھا۔

مزید برآں نیویارک ٹائمز نے دعویٰ کیا کہ ابو مرزوق نے کہا کہ حماس اپنے ہتھیاروں کے مستقبل پر بات چیت کے لیے تیار ہے۔

مزید پڑھیں: غزہ کی جنگ کے اثرات اور اس کا مستقبل

تاہم، حماس نے ان تمام دعوؤں کو سختی سے مسترد کر دیا ہے اور نیویارک ٹائمز پر جانبدارانہ صحافت کا الزام لگایا ہے۔