ممبئی (سچ خبریں) بالی ووڈ کے معروف اداکار عامر خان نے اپنے ایک انٹرویو میں انکشاف کیا ہے کہ اُن کی زندگی میں تین خواتین سب سے زیادہ اہم ہیں جن میں اُن کی والدہ، سابقہ اہلیہ رینا دتہ اور کرن راؤ شامل ہیں انہوں نے یہ انکشاف گزشتہ روز اپنی دوسری بیوی کرن راؤ کے ساتھ طلاق کا اعلان کرنے کے بعد کیا۔
عامر خان کی دوسری طلاق کے بعد معروف بھارتی اخبار کی جانب سے اداکار کا وہ انٹرویو شائع کیا گیا جو اُنہوں نے اپنی پہلی بیوی رینا دتہ کی طلاق کے بعد میڈیا کو دیا تھا۔ہندوستان ٹائمز کو 2012 میں دیے گئے ایک انٹرویو میں عامر خان نے کہا تھا کہ ’رینا اور میری شادی 16 سال تک قائم رہی تھی اور جب ہم نے شادی کی تھی تو اُس وقت ہماری عُمر کافی کم تھی۔
عامر خان نے کہا تھا کہ ’رینا اور میری علیحدگی زندگی کا ایک مشکل ترین فیصلہ تھا جبکہ ہمارا رشتہ کافی خاص تھا جو میرے دل کے بہت قریب بھی ہے۔بالی ووڈ اداکار نے کہا کہ ’رینا سے طلاق کے بعد، میں تین سے چار سال تک تنہا رہا اور پھر اس کے بعد کرن راؤ سے میری ملاقات ہوئی اور پھر ہم نے شادی کی۔
عامر خان نے کہا کہ ’رینا سے طلاق کے باوجود بھی میرے دونوں بچے اپنے دوسری والدہ یعنی کرن اور اُن کے بیٹے آزاد کے بہت قریب ہیں۔اُنہوں نے انکشاف کیا کہ ’میری زندگی میں تین خواتین سب سے زیادہ اہم ہیں، جن میں میری والدہ، سابقہ اہلیہ رینا دتہ اور کرن راؤ شامل ہیں اور ان کی تصاویر ہمیشہ میرے فون میں بھی ہوتی ہیں۔
خیال رہے کہ بالی ووڈ اسٹار عامر خان نے اہلیہ کرن راؤ سے 15 برس تک رشتۂ ازدواج میں منسلک رہنے کے بعد باضابطہ طور پر طلاق کا اعلان کردیا ہے۔ عامر خان اور کرن راؤ 28 دسمبر 2005 کو شادی کے بندھن میں بندھے تھے، ان کے ہاں 2011 میں بیٹے آزاد راؤ خان کی پیدائش ہوئی تھی۔تاہم اب دونوں نے طلاق سے متعلق مشترکہ بیان جاری کیا جس میں انہوں نے اپنے چاہنے والوں کو بتایا کہ ان کی شادی اختتام پذیر ہوگئی ہے، لیکن اسے ایک نئے سفر کے طور پر دیکھا جائے۔
