بولی وڈ اسٹار بننے کی کوئی خواہش نہیں ہے، دلجیت دوسانجھ کی ویڈیو وائرل

?️ 27 جون 2025

سچ خبریں: بھارتی گلوکار و اداکار دلجیت دوسانجھ کی ایک پرانی ویڈیو وائرل ہوگئی ہے، جس میں وہ کہتے ہیں کہ نہ انہیں بولی وڈ میں کام کرنے کا شوق ہے اور نہ ہی بولی وڈ اسٹار بننے کی کوئی خواہش ہے۔

دلجیت دوسانجھ کو پنجابی فلم ’سردار جی تھری‘ کے ٹریلر ریلیز ہونے کے بعد شدید مخالفت کا سامنا ہے۔

بھارتی فلم سازوں کی جانب سے ہانیہ عامر کے ساتھ کام کرنے پر دلجیت دوسانجھ کے مکمل بائیکاٹ کا مطالبہ کیا جا رہا ہے۔

حال ہی میں ایک انٹرویو میں دلجیت دوسانجھ نے فلم کی بیرون ملک ریلیز سے متعلق ردعمل دیتے ہوئے کہا کہ فلم کی شوٹنگ کے دوران حالات معمول کے مطابق تھے، تاہم فروری کے بعد کچھ ایسے واقعات پیش آئے جو ان کے قابو میں نہیں تھے۔

انہوں نے کہا کہ فلم کے پروڈیوسرز نے فیصلہ کیا ہے کہ یہ فلم بیرونِ ملک ریلیز کی جائے گی، کیونکہ اس پر بہت زیادہ سرمایہ لگ چکا ہے اور وہ اس فیصلے میں پروڈیوسرز کے ساتھ کھڑے ہیں۔

دوسری جانب دلجیت دوسانجھ کا چار سال پرانا انٹرویو حال ہی میں سوشل میڈیا پر وائرل ہو رہا ہے، جس میں وہ موسیقی سے اپنی محبت کا اظہار کرتے ہوئے کہہ رہے ہیں کہ انہیں بولی وڈ میں کام کرنے میں کوئی دلچسپی نہیں ہے بلکہ وہ صرف گلوکاری کرنا چاہتے ہیں اور اس کے لیے انہیں کسی کی منظوری کی ضرورت نہیں ہے۔

ویڈیو میں گلوکار کہتے ہیں کہ نہ انہیں بولی وڈ میں کام کرنے کا شوق ہے اور نہ ہی بولی وڈ اسٹار بننے کی کوئی خواہش ہے۔

انہوں نے مزید کہا کہ انہیں موسیقی پسند ہے اور وہ بغیر کسی بڑے نام یا اسٹار کی منظوری کے موسیقی بناتے رہیں گے۔

وائرل ویڈیو میں دلجیت دوسانجھ کا کہنا ہے کہ کوئی انہیں موسیقی بنانے سے نہیں روک سکتا، جب تک وہ محسوس کرتے ہیں کہ وہ کام کر سکتے ہیں، وہ کرتے رہیں گے اور جب تک خدا چاہے گا، وہ گانے بناتے رہیں گے، چاہے بولی وڈ میں کام ملے یا نہ ملے۔

خیال رہے کہ فلم ’سردار جی تھری‘ کی ٹیم اعلان کر چکی ہے کہ یہ فلم بھارت کے علاوہ بیرونِ ممالک میں 27 جون کو ریلیز کی جائے گی۔