مسئلہ کشمیر کے حل کے لیئے عمران خان اور آرمی چیف کا اہم بیان، حریت رہنماؤں نے خیرمقدم کردیا

?️ 20 مارچ 2021

سرینگر (سچ خبریں) کچھ دن پہلے وزیراعظم عمران خان اور آرمی چیف جنرل قمر جاوید باجوہ نے بھارت پر زور دیتے ہوئے کہا تھا کہ پاکستان سے تعلقات بحال کے کرنے کے لیے بھارت کو پہلا قدم اٹھانا چاہیے۔

تفصیلات کے مطابق وزیراعظم عمران خان سکیورٹی ڈائیلاگ کا افتتاح کرتے ہوئے کہا تھا کہ ہم کوشش کر رہے ہیں لیکن بھارت کو پہلا قدم بڑھانا ہو گا اور جب تک وہ ایسا نہیں کرتے، ہم آگے نہیں بڑھ سکتے۔

دوسری جانب اسلام آباد میں دو روزہ سکیورٹی ڈائیلاگ کی اختتامی تقریب سے خطاب کرتے ہوئے آرمی چیف جنرل قمر جاوید باجوہ نے کہا تھا کہ برصغیر میں امن کا خواب اس وقت تک ادھورا رہے گا، جب تک مسئلہ کشمیر حل نہیں ہوجاتا اور اب وقت آگیا ہے کہ ماضی کو دفن کیا جائے اور آگے بڑھا جائے۔

وزیراعظم اور آرمی چیف کے ان بیانات کے بعد مقبوضہ کشمیر میں حریت رہنمائوں نے ان بیانات کا خیرمقدم کرتے ہوئے کہاہے کہ پاکستان مسئلہ کشمیر کے حل میں سنجیدہ ہے۔

کشمیرمیڈیاسروس کے مطابق کل جماعتی حریت کانفرنس کے رہنما اور ڈیموکریٹک پولٹیکل موومنٹ کے چیئرمین خواجہ فردوس نے سرینگر سے جاری ایک بیان میں کہاکہ وزیر اعظم عمران خان اور جنرل قمر جاوید باجوہ نے اسلام آباد میں منعقدہ دو روزہ کانفرنس میں مسئلہ کشمیر کے پرامن حل پر زور دیا ہے جس سے واضح ہوگیا ہے کہ پاکستان مسئلہ کے حل میں سنجیدہ ہے۔

انہوں نے کہا کہ پاکستانی قیادت مسئلہ کشمیر کا کشمیری عوام کی خواہشات اور اقوام متحدہ کی قرار دادوں کے مطابق حل چاہتی ہے تاکہ جنوبی ایشیاء میںپائیدار امن وسلامتی قائم ہوسکے، تاہم انہوں نے کہاکہ بھارت کی روایتی ہٹ دھرمی پر مبنی پالیسی تنازعہ کشمیر کے حل میں سب سے بڑی رکاوٹ ہے۔

خواجہ فردوس نے کہا کہ کشمیری عوام پاکستان کی حکومت اور قیادت کے مشکور ہیں جنہوں نے ہمیشہ مسئلہ کشمیر کو عالمی سطح پر اجاگر کرنے کیلئے اپنی ذمہ داریاں احسن طریقے سے نبھائی ہیں۔

انہوں نے کہا کہ پاکستان کشمیریوں کے اپنے حق خودارادیت کے حصول کی منصفانہ جدوجہد کی سیاسی، سفارتی اور اخلاقی حمایت جاری رکھے ہوئے ہے۔

حریت رہنما نے بھارت پر زور دیا کہ وہ اپنی ہٹ دھرمی پر مبنی پالیسی ترک کرتے ہوئے دیرینہ تنازعہ کے حل کیلئے اقدامات کرے تاکہ جنوبی ایشیاء میں پائیدار امن قائم ہوسکے۔

ادھر اسلامی تنظیم آزادی کے چیئرمین عبدالصمد انقلابی نے سرینگر میں ایک بیان میں بری فوج کے سربراہ جنرل قمر جاوید باوجوہ کے کشمیر کے بارے میں بیان کا خیرمقدم کرتے ہوئے بھارت پر زوردیا کہ وہ کشمیری عوام کی خواہشات اور اقوام متحدہ کی سلامتی کونسل کی قراردادوں کے مطابق تنازعہ کشمیر کے حل کیلئے عملی اقدامات کرے۔

دریں اثناء جموں و کشمیر ڈیموکریٹک فریڈم پارٹی کے قائمقام چیئرمین محمود احمد ساغر نے بھی اسلام آباد میں جاری ایک بیان میں مسئلہ کشمیر کے بارے میں بری فوج کے سربراہ جنرل قمر جاوید باوجوہ کے بیان کا خیرمقدم کیا ہے۔

انہوں نے بھارت پر زوردیا کہ وہ زمینی حقائق تسلیم کرتے ہوئے دیرینہ تنازعہ کشمیر کے حل کیلئے پاکستان کے ساتھ مذاکرات شروع کرے۔

انہوں نے کہاکہ جنرل باوجوہ کا بیان بھارت اور پاکستان کو جموں و کشمیر سمیت تمام تصفیہ طلب مسائل کے حل کا موقع فراہم کرتا ہے، محمود احمد ساغر نے واضح کیا کہ حل طلب تنازعہ کشمیر خطے میں پائیدار امن و استحکام اور خوشحالی کی راہ میں سب سے بڑی رکاوٹ ہے۔