حریت رہنما شبیر احمد شاہ کی بیٹی نے اپنے والد کی رہائی کے لئے اہم قدم اٹھا لیا

🗓️ 28 اپریل 2021

سرینگر (سچ خبریں)  مقبوضہ کشمیر میں حریت رہنما شبیر احمد شاہ کی بیٹی سحر شبیر شاہ نے اپنے والد کی رہائی کے لئے اہم قدم اٹھاتے ہوئے آنلائن مہم کا آغاز کردیا ہے۔

تفصیلات کے مطابق مقبوضہ کشمیر میں کل جماعتی حریت کانفرنس کے سینئر رہنما اورجموں و کشمیر ڈیموکریٹک فریڈم پارٹی کے سربراہ شبیراحمد شاہ کی بیٹی سحر شبیر شاہ نے اپنے والد کی رہائی کے لئے ایک آنلائن مہم شروع کردی ہے۔

کشمیرمیڈیا سروس کے مطابق شبیراحمد شاہ نے تنازعہ کشمیر کے حل کے مطالبے پر اپنی زندگی کے 33سال مختلف جیلوں میں گزارے ہیں، سحر شبیر#FreeShabirShahاور#freepoliticalprisoners مہم کے ذریعے اپنے والد کے ساتھ ساتھ دیگر کشمیری نظربندوں کی رہائی کے لئے بھی کوشاں ہے۔

موصولہ اطلاعات کے مطابق وہ اپنی مہم کے دوران اقوام متحدہ کی انسانی حقوق کونسل جیسی انسانی حقوق کی عالمی تنظیموں اور بھارت کے صدر اور وزیر اعظم کو بھی ٹیگ کررہی ہیں۔

سحر شاہ کا کہنا ہے کہ میں نے اپنے والد سے جنہوں نے اپنی زندگی کا بیشتر حصہ عقوبت خانوں میں گزارا ہے، ملتے ہوئے ہمیشہ یہ محسوس کیا کہ ان کا عزم پہلے سے بہت مضبوط ہوچکا ہے۔

انہوں نے کہا کہ جیل کی سختیوں کے باوجود وہ اپنے موقف پر چٹان کی طرح قائم ہیں، انہوں نے کہا کہ شبیر احمد شاہ کو پہلی بار 14 سال کی عمر میں گرفتار کیا گیا۔

واضح رہے کہ جموں و کشمیر ڈیموکریٹک فریڈم پارٹی کے سربراہ شبیراحمد شاہ جولائی 2017 سے دہلی کی بدنام زمانہ تہاڑ جیل میں نظربند ہیں جب بھارتی تحقیقاتی ادارے این آئی اے نے انہیں سرینگر سے گرفتار کیا تھا۔