مقبوضہ کشمیر میں بھارتی دہشت گردی اقوام متحدہ کی ناکامی کی واضح مثال ہے: حریت کانفرنس

🗓️ 22 اپریل 2021

سرینگر (سچ خبریں) کل جماعتی حریت کانفرنس نے مقبوضہ کشمیر میں بھارتی دہشت گردی کو اقوام متحدہ کی واضح ناکامی قرار دیتے ہوئے کہا ہے کہ اقوام متحدہ صرف ایک نام نہاد ادارہ بن چکا ہے جس کی دنیا میں اب کوئی حیثیت نہیں ہے اور نہ ہی وہ آج تک مظلوموں کو ان کا حق دلانے میں کامیاب رہا ہے۔

کشمیر میڈیاسروس کے مطابق اقوام متحدہ کی سلامتی کونسل کی قراردار نمبر 47 کی منظوری کے 73 برس مکمل ہونے کے موقع پر کل جماعتی حریت کانفرنس کے ترجمان نے سرینگر میں ایک بیان میں کہا کہ عالمی ادارے نے 21 اپریل 1948 کی قرارداد سمیت متعدد قراردادیں منظور کیں جن میں کشمیریوں کے حق خودارادیت کو تسلیم کیا گیا اور جموں و کشمیر میں رائے شماری کرانے پر زور دیا گیا۔

انہوں نے کہا کہ اقوام متحدہ نے مشرقی تیمور، کوسوو اور جنوبی سوڈان سمیت متعدد بین الاقوامی تنازعات کے حل میں کردار ادا کیا ہے لیکن وہ مسئلہ کشمیر کے حوالے سے قراردادوں کے متعلق اپنی ذمہ داریاں نبھانے میں ناکام رہا۔

انہوں نے کہا کہ مقبوضہ جموں و کشمیر کی حصوصی حیثیت ختم کرنے کے 5 اگست2019 کے بھارتی اقدام کا مقصد دراصل کشمیریوں کی اصل شناخت مٹانا ہے۔

ترجمان نے عالمی ادارے پر زور دیا کہ وہ کشمیریوں کی مشکلات دور کرنے کیلئے اپنی قرار دادوں پر مزید کسی تاخیر کے عملدرآمد کرائے اور مقبوضہ علاقے کی خصوصی حیثیت بحال کرانے کے لیے بھارت پر دبائو ڈالے۔

دریں اثنا جموں و کشمیر پیپلزلیگ، جموں و کشمیر ماس موومنٹ اور جموں و کشمیر یوتھ سوشل فورم اینڈ جسٹس لیگ نے اپنے بیانات میں کہا کہ فسطائی بھارتی حکمران مقبوضہ جموں و کشمیر کے لوگوں کو مذہبی اور دیگر حقوق سے محروم رکھ کر انسانیت کے خلاف سنگین جرائم کا ارتکاب کر رہی ہے۔