مقبوضہ کشمیر میں بھارت کی جانب سے نسل کشی جاری، قائد حریت نے جمعہ کو مکمل ہڑتال کا اعلان کردیا

?️ 15 اپریل 2021

سرینگر (سچ خبریں) مقبوضہ کشمیر میں بھارت کی جانب سے کشمیری عوام کی نسل کشی جاری ہے جس کے مدنظر قائد حریت سید علی شاہ گیلانی نے جمعہ کو مکمل ہڑتال کا اعلان کردیا ہے۔

تفصیلات کے مطابق قائد تحریک آزادی کشمیر سید علی شاہ گیلانی نے مقبوضہ وادی میں کشمیریوں کی جاری نسل کشی اور شعائر اسلام کی بے حرمتی کے خلاف جمعہ کو ہڑتال اور مظاہروں کا اعلان کرتے ہوئے قوم سے اپیل کی ہے کہ وادی میں انسانی حقوق کی بدترین بھارتی پامالی کے خلاف جمعہ کو مکمل ہڑتال اور نماز جمعہ کے بعد ہر ضلعی صدر مقام پر احتجاجی مظاہروں کا اہتمام کریں۔

سید علی شاہ گیلانی نے کہا کہ مقبوضہ وادی کے شوپیاں، پلوامہ، اور بیج بہاڑہ علاقوں میں نام نہاد فوجی حصار کے دوران 12کشمیری نوجوانوں کو شہید کرنے کے ساتھ ساتھ مسجد اور قرآن مجید کی بے حرمتی کرکے قابض فوج نے ایک بار پھر اپنی ذہنی پستی اور اخلاقی دیوالیہ پن کا مظاہرہ کیا ہے۔

انہوں نے مزید کہا کہ مسلمانوں کے مذہبی جذبات کو مجروح کرنا اگرچہ فسطائیت کی علمبردار بھارت کی موجودہ حکمران جماعت کا محبوب مشغلہ رہا ہے لیکن ہم بھارتی حکمرانوں کو انتباہ کرنا چاہیے ہیں کہ کشمیر میں ان کے ان مذموم ہتھکنڈوں کو ہرگز برداشت نہیں کیاجائے گا۔

انہوں نے بھارت کو شدید انتباہ کرتے ہوئے کہا کہ اگر بھارتی حکمران اس زعم میں ہیں کہ اس طرح کی مذموم حرکتوں سے وہ کشمیری عوامکو اپنے موقف سے ہٹنے یا اپنے مطالبہ آزادی سے دستبردار ہونے کے لیے مجبور کرسکتے ہیں توہ وہ جان لیں کہ یہ ان کی خام خیالی ہے اور غیر ممکن اور محال کام ہے لہٰذا اس خیال کو چھوڑ دیں۔

ان کا مزید کہنا تھا کہ مذہب اور مذہبی مقامات پر اس طرح کے گستاخانہ حملوں کے انتہائی تباہ کن نتائج سامنے آئیں گے اور یہی بات بھارتی حکمرانوں کے ساتھ ساتھ عالمی اداروں اور عالمی برادری پر بھی یہ اخلاقی ذمے داری عائد ہوتی ہے کہ وہ اپنے خوابیدہ ضمیر کو جھنجھوڑ کر کشمیر میں جاری بھارتی جرائم کا نوٹس لیتے ہوئے بھارت کے خلاف قرار واقعی کارروائی کریں۔