لبریشن فرنٹ کے زیر اہتمام "سیو یاسین ملک کانفرنس”26اگست کومنعقد کی جائے گی

?️ 22 اگست 2025

اسلام آباد: (سچ خبریں) مودی کی بھارتی حکومت جموں و کشمیر لبریشن فرنٹ کے غیر قانونی طورپر نظربند چیئرمین محمد یاسین ملک کو مسلسل بدترین سیاسی انتقام کا نشانہ بنارہی ہے۔

کشمیرمیڈیاسروس کے مطابق لبریشن فرنٹ کے مرکزی ترجمان محمد رفیق ڈار نے ایک بیان میں یاسین ملک کو ان کے سیاسی عقائد کی وجہ سے جھوٹے اور من گھڑت مقدمات میں یکطرفہ عدالتی کاروائی کے نتیجے میں مئی2022 کو دی جانے والی عمر قید کی سزا کو اب بھارتی حکومت پھانسی کی سزا میں تبدیل کروانے پر تلی ہوئی ہے۔

انہوں نے کہاکہ لبریشن فرنٹ نے یاسین ملک کی آواز بلند کرنے کیلئے 26اگست بروز منگل کواسلام آباد میں "سیو یاسین ملک کانفرنس” منعقد کرنے کا فیصلہ کیاہے ۔ کانفرنس میں مقتدر سیاسی رہنمائوں کے علاوہ نامور صحافتی برادری، انسانی حقوق اور سول سوسائٹی سے وابستہ نمائندگان شرکت کریں گے۔

کانفرنس میں کنٹرول لائن کے دونوں اطراف کی سیاسی تنظیموں کے سربراہان کے علاوہ انسانی حقوق اور سول سوسائٹی کی تنظیموں کو شرکت کی دعوت دی جائے گی۔

کانفرنس کی تیاریوں کے سلسلے میں لبریشن فرنٹ کے مرکزی وائس چیئرمین سلیم ہارون کی سربراہی میں ایک انتظامی کمیٹی سرگرم ہے، جو کانفرنس کے انتظامات کو حتمی شکل دے رہی ہے۔

کانفرنس میں شرکا کی طرف سے یاسین ملک کے خلاف قائم کئے گئے بے بنیاد مقدمات اور بھارتی اقدامات سے متعلق قابل عمل تجاویز پر مبنی قومی سطح کے اہم پروگرامات و اقدامات کا اعلان کیاجائے گا۔