ایران کے ساتھ جنگ کے نتائج ناقابل تلافی ہوں گے؛ امریکی فوج کا ٹرمپ کو انتباہ

?️ 24 فروری 2026

سچ خبریں:امریکی جوائنٹ چیفس آف اسٹاف کے چیئرمین نے ایران کے ساتھ کسی بھی ممکنہ جنگ کے ناقابل تلافی نتائج کے بارے میں ٹرمپ کو خبردار کیا ہے۔

امریکی جوائنٹ چیفس آف اسٹاف کے چیئرمین نے ٹرمپ کو ایران کے خلاف فوجی کارروائی کے سنگین نتائج سے آگاہ کر دیا، امریکی گولہ بارود کے ذخائر میں کمی اور ممکنہ طویل تنازع کے خطرات پر روشنی ڈالی گئی۔

یہ بھی پڑھیں:ایران وینزوئلا نہیں؛ فرانسیسی سفارتکار کی ٹرمپ کو وارننگ

خبر رساں ویب سائٹ ایکسیوس نے رپورٹ دی ہے کہ امریکی جوائنٹ چیفس آف اسٹاف کے چیئرمین نے ڈونلڈ ٹرمپ کو مشورے میں ایران کے خلاف کسی بھی فوجی کارروائی کے ناقابل تلافی نتائج کے بارے میں خبردار کیا ہے۔

ایکسیوس نے اپنی رپورٹ میں مزید کہا ہے کہ ٹرمپ نے ایک چھوٹی ٹیم کو اختیار دیا ہے کہ وہ ایران کی صورتحال کا جائزہ لے اور ان اختیارات پیش کرے جو وہ استعمال کر سکیں۔

اس رپورٹ میں واضح طور پر بتایا گیا ہے کہ ٹرمپ نے اصرار کیا ہے کہ وٹکاف اور کشنر ایران کے ساتھ مزید مذاکرات کریں تاکہ اس بات کو یقینی بنایا جا سکے کہ تمام ممکنہ راستے آزما لیے گئے ہیں۔

ذرائع کے مطابق، جوائنٹ چیفس کے چیئرمین جنرل ڈین کین نے وائٹ ہاؤس میں ہونے والی ایک میٹنگ کے دوران ٹرمپ اور ان کے اعلیٰ معاونین کو بتایا کہ ایران کے خلاف کسی بھی بڑے آپریشن کو گولہ بارود کے ذخائر میں نمایاں کمی کا سامنا کرنا پڑے گا، جو اسرائیل کے دفاع اور یوکرین کی حمایت کی وجہ سے پیدا ہوئی ہے ۔

پینٹاگون میں ہونے والی میٹنگز میں بھی کین نے ایران مہم کے پیمانے، اس کی پیچیدگی اور امریکی فوجی ہلاکتوں کے امکان کے بارے میں تشویش کا اظہار کیا ہے ۔ ان کا کہنا تھا کہ اتحادیوں کی حمایت کی کمی کی وجہ سے کوئی بھی آپریشن مزید مشکل ہو جائے گا ۔

وال سٹریٹ جرنل کے مطابق، امریکی حکام کو خدشہ ہے کہ ایران کے ساتھ طویل تنازع امریکی فوجیوں اور گولہ بارود کے ذخائر کے بڑے پیمانے پر نقصان کا سبب بن سکتا ہے، اور ایران کی کامیاب جوابی کارروائی اتحادیوں کے تحفظ میں خلل ڈال سکتی ہے ۔

تاہم، ٹرمپ نے ان رپورٹس کو مسترد کرتے ہوئے اپنی سوشل میڈیا سائٹ ٹرتھ سوشل پر لکھا کہ یہ خبریں 100 فیصد غلط ہیں ۔ انہوں نے مزید کہا کہ چیئرمین کین، ہم سب کی طرح، جنگ نہیں چاہتے، لیکن اگر ہم ایران پر حملہ کرتے ہیں تو ان کا خیال ہے کہ ہم آسانی سے جیت سکتے ہیں۔

مزید پڑھیں: خطے میں بڑہتی ایران کی طاقت کو دیکھتے ہوئے امریکا اور اسرائیل میں کھلبلی مچ گئی

واضح رہے کہ ایران اور امریکہ کے درمیان مذاکرات کا ایک نیا دور جمعرات کو جنیوا میں متوقع ہے، جو مبصرین کے مطابق ممکنہ طور پر آخری سفارتی موقع ہو سکتا ہے ۔