کرگل : آیت اللہ خامنہ ای کے حوالے سے بھارتی میڈیا کی مذموم مہم کیخلاف احتجاجی ریلی

?️ 30 جولائی 2025

کرگل: (سچ خبریں) بھارت کے غیر قانونی زیر قبضہ جموں وکشمیر کے خطے کرگل میں بھارتی میڈیا کی اسلامی جمہوریہ ایران کے سپریم رہنما آیت اللہ سید علی خامنہ ای کے حوالے سے مذموم مہم کے خلاف ایک زبردست احتجاجی ریلی نکالی۔

کشمیر میڈیا سروس کے مطابق امام خمینی میموریل ٹرسٹ( آئی کے ایم ٹی)کے زیر اہتمام احتجاجی ریلی مرکزی جامع مسجد سے شروع ہوئی اور امام خمینی چوک سے ہوتی ہوئی لال چوک کرگل پر اختتام پذیر ہوئی ۔

ریلی میں زندگی کے مختلف شعبوں سے تعلق رکھنے والے لوگوں کی ایک بڑی تعداد نے شرکت کی۔ انہوں نے سپریم رہنما آیت اللہ سید علی خامنہ ای کے خلاف بھارتی میڈیا پروپیگنڈے کے خلاف نعرے لگائے ۔انہوں نے ہاتھوں میں پلے کارڑ بھی اٹھا رکھے تھے جن پر آیت اللہ خامنہ ای کے ساتھ اظہار یکجہتی کے نعرے درج تھے۔

حاجی اصغر کربلائی اور سید علی موسوی سمیت دیگر مقررین نے آیت اللہ سید علی خامنہ ای کے حوالے سے ہتک آمیز مواد پھیلانے پر بھارتی اور بین الاقوامی میڈیا کی مذمت کی۔ ان کا کہنا تھا کہ یہ مہم اسلامی اتحاد اور قیادت کو کمزور کرنے کے وسیع تر منصوبے کا حصہ ہے۔ انہوں نے کہا کہ سلام دشمنوں نے ہمیشہ مسلمانوں کی قیادت کو نشانہ بنایا ہے۔انہوں نے ہاتھوں میں پلے کارڑ بھی اٹھا رکھے تھے جن پر آیت اللہ خامنہ ای کے ساتھ اظہار یکجہتی کے نعرے درج تھے۔

دریں اثنا کشمیری عالم دین مولانا وسیم رضا قمی نے بھی قم ایران سے فون پر گفتگو کرتے ہوئے بھارت ی ذرائع ابلاغ کی طرف سے نشر کیے جانے والے گستاخانہ مواد کی مذمت کی۔انہوں نے مقبوضہ جموں و کشمیر کے عوام پر زور دیا کہ وہ اشتعال انگیزیوں کے باوجود متحد رہیں اور بین المذاہب ہم آہنگی کو برقرار رکھیں۔