میرواعظ کا حضرت شیخ العالم ؒ کو خراج عقیدت

?️ 17 اکتوبر 2025

سرینگر: (سچ خبریں) بھارت کے غیر قانونی زیر قبضہ جموں وکشمیر میں کل جماعتی حریت کانفرنس کے سینئر رہنما میر واعظ عمر فاروق نے وادی کشمیر کے بلند پایہ ولی کامل حضرت شیخ العالم، شیخ نو رالدین نورانی ؒ کو انکے عرس کے موقع پر شاندار خراج عقیدت پیش کرتے ہوئے انہیں شریعت و طریقت اور حقیقت و معرفت کامجسمہ قرار دیا ہے۔ میر واعظ نے کہا کہ حضرت شیخ العالم نورالدین نورانیؒ کا پیغامِ توحید، محبت، سادگی اور خدمتِ خلق آج بھی ہماری رہنمائی کرتا ہے۔

کشمیر میڈیا سروس کے مطابق میر واعظ نے آج سرینگر کی تاریخی جامع مسجد میں نماز جمعہ کے اجتماع سے خطاب کرتے ہوئے کہا کہ اس برگزیدہ ولیِ کامل نے اپنی گہری روحانیت اور حکمت و دانائی سے عبارت شاعری کے ذریعے قرآنِ کریم کی تعلیمات کو کشمیری زبان میں عام کیا تاکہ دینِ اسلام کا پیغام ہر خاص و عام تک پہنچے ،آپؒ نے وادی کشمیر میں خدا ترسی، اصلاحِ نفس، رواداری اور باہمی احترام کی ایسی ثقافت کو پروان چڑھایا جو صدیوں سے کشمیری سماج کی شناخت بن چکی ہے۔
انہوں نے کہا کہ شیخ العالم ؒنے ہمیں یہ سکھایا کہ عزت و وقار نسب یا خاندان سے نہیں بلکہ نیکی اور پرہیزگاری سے حاصل ہوتا ہے اور حقیقی اصلاح اپنے نفس کی تطہیر سے شروع ہو کر خدمتِ خلق پر مکمل ہوتی ہے۔انہوں نے کہا کہ آپ ؒ کے کشمیری زبان میں اشعار ہمیشہ کشمیریوں کے دلوں کو منور کرتے رہیں گے۔میر واعظ نے اس موقع پر اعلان کیا کہ ان شاءاللہ اگلے جمعے کو درگاہ چرارِ شریف میں ایک خصوصی وعظ و تبلیغ کی مجلس آراستہ ہوگی جس میں وہ حضرت شیخ العالمؒ کی تعلیمات اتحاد، اخلاقی تجدید اور ان کی موجودہ دور میں اہمیت اورمعنویت پر روشنی ڈالیں گے۔