مسلمانوں کے اتحاد، اسلامی اقدار کے فروغ اور روحانی و سماجی ترقی میں مساجد کا مرکزی کردارہے :میرواعظ

?️ 21 جولائی 2025

سرینگر: (سچ خبریں) غیرقانونی طورپر بھارت کے زیر قبضہ جموں وکشمیر میں کل جماعتی حریت کانفرنس کے سینئر رہنما میر واعظ عمر فاروق نے کہا ہے کہ مسلمانوں کے اتحاد، اسلامی اقدار کے فروغ اور روحانی و سماجی ترقی میں مساجد کا مرکزی کردارہے۔

کشمیر میڈیاسروس کے مطابق میر واعظ عمر فاروق نے چھانہ پورہ سرینگر میں مسجد بلال کی تعمیر نو کا سنگ بنیاد رکھتے ہوئے مساجد کو اتحاد و اصلاح کے مراکز بنانے پر زوردیا۔

انہوں نے کہا کہ مسجد اسلامی اتحاد کا مرکز ہے جہاں اذان کی صدا ہر مومن کو بلاتی ہے، چاہے ا س کا تعلق کسی بھی مسلک یا پس منظر سے ہو۔ مساجد کو مسلکی بنیادوں پر تقسیم نہیں کیا جانا چاہیے۔ یہ اللہ کا گھر ہے اور ہر مو من کے لیے کھلا ہونا چاہیے۔

میرواعظ نے لوگوں پر زور دیا کہ وہ اپنے مسلک کو اخلاص کے ساتھ اپنائیں لیکن دوسروں پر تنقید سے گریز کریں۔انہوں نے کہاکہ ہم ا ن عناصر کو کامیاب نہیں ہونے دیں گے جو فرقہ واریت کو ہوا دے کر ہمارے اتحاد کو کمزور کرنا چاہتے ہیں۔

انہوں نے کہاکہ امت کی طاقت اس کے اتحاد میں ہے۔انہوں نے واضح کیاکہ صحابہ کرام کی توہین کسی صورت میں برداشت نہیں کی جا سکتی اور صحابہ کرام و اہل بیت سے اظہار محبت اسلام کے بنیادی عقائد میں شامل ہے، جو ا مت کو جوڑنے والی بنیاد ہے۔

میرواعظ نے مسجد کمیٹیوں سے اپیل کی کہ وہ نوجوانوں کو فعال طور پر شامل کریںتاکہ مساجد نہ صرف ان کی علمی و روحانی تربیت کا ذریعہ بنیں بلکہ وہ سماجی خدمت اور معاشرے کی اصلاح میں بھی حصہ لیں۔

انہوں نے مسجد بلال کے نئے منصوبے میں خواتین کے لیے علیحدہ اور مخصوص حصہ مختص کرنے کو خوش آئند قدم اور ایک مثبت پیش رفت قرار دیا۔انہوں نے کہا کہ مساجد کو منشیات، فرقہ واریت اور اخلاقی زوال جیسے سماجی مسائل کے حل کے لیے بھی کردار ادا کرنا چاہیے۔

انہوں نے کہا کہ ائمہ اور مسجد کمیٹیاں سادگی کے ساتھ باوقار نکاح کے فروغ میں بھی اہم کردار ادا کر سکتی ہیں جو فضول اخراجات اور معاشرتی دبائوکو کم کر کے اسلامی تعلیمات کے مطابق ازدواجی بندھن کو آسان بنا سکتی ہیں۔