سرینگر: (سچ خبریں)کل جماعتی حریت کانفرنس نے چیف آف آرمی سٹاف جنرل سید عاصم منیر کے دوٹوک بیان کو کشمیری عوام کی امنگوں اور خواہشات کے مطابق قرار دیتے ہوئے کہاہے کہ اس سے تحریک آزادی کشمیر میں نیا ولولہ پیدا ہوا ہے۔
کشمیر میڈیا سروس کے مطابق حریت رہنمائوں سید بشیر اندرابی ، خواجہ فردوس ، زمرودہ حبیب ، غلام نبی وار، اسلامی تنظیم آزادی جموں کشمیر ، جموں و کشمیر پولیٹکل ریزسٹنس مومنٹ کے چیئرمین جمیل میر اور ینگ مینز لیگ کے چیئرمین معراج الدین شیخ نے اپنے الگ الگ بیانات میں کہاہے کہ چیف آف آرمی سٹاف جنرل سید عاصم منیر کے حالیہ بیان سے کشمیری عوام کو زبردست حوصلہ ملا ہے۔
حریت رہنماؤں نے کہا کہ آرمی چیف نے کشمیریوں کی حق پر مبنی تحریک کی اخلاقی، سیاسی اور سفارتی حمایت کا اعادہ کیا ہے جو لائق تحسین ہے۔ حریت رہنمائوں نے کہا کہ جب تک مسئلہ کشمیر کو کشمیری عوام کی خواہشات اور اقوا م متحدہ کی قرار دادوں کے مطابق حل نہیں کیا جاتا ،جنوبی ایشیا میں پائیدار امن قائم نہیں ہوسکتا۔ انہوں نے آرمی چیف کے بیان کو مقبوضہ جموں و کشمیر میں موجود دس لاکھ سے زائد بھارتی فوجیوں کے ہاتھوں کشمیریوں کو لگنے والے زخموں پر مرہم قرار دیا ہے۔
انہوں نے کہاکہ گزشتہ سات دہائیوں سے پاکستان مسلسل کشمیری عوام کو سیاسی،سفارتی،اخلاقی حمایت کررہا ہے اور وہ مسئلہ کشمیر کو پرامن ،منصفانہ طورپر اور اقوام متحدہ کی قرار دادوں کے مطابق حل کرانے کیلئے عالمی سطح پر کشمیریوں کی آواز بن رہا ہے ۔ انہوں نے کہا کہ بھارت نے مقبوضہ جموںو کشمیر میں قتل وغارت کا سلسلہ جاری رکھا ہے اور یہ عالمی امن کے لئے خطرہ اور مہذب دنیا کیلئے لمحہ فکریہ ہے۔ حریت رہنمائوں نے عالمی برادری پر زور دیا کہ وہ خواب غفلت سے بیدار ہوکر مسئلہ کشمیر کو اقوام متحدہ کی قرار دادوں اورکشمیری عوام کی امنگوں کے مطابق حل کرانے میں اپنا کردار ادا کریں۔
دریں اثناء کل جماعتی حریت کانفرنس آزاد کشمیر شاخ کے سینئر رہنما الطاف حسین وانی نے آرمی چیف جنرل سید عاصم منیر کے کشمیر سے متعلق حالیہ بیان کا خیرمقدم کرتے ہوئے کہا ہے کہ آرمی چیف کے جرأت مندانہ بیان نے بھارتی ڈس انفارمیشن نیٹ ورکس کو پوری طرح بے نقاب کر دیا ہے۔ حریت رہنما نے کہا کہ پاکستان اور اس کی مسلح افواج نے، جنہیں مقبوضہ کشمیر کے لوگ اپنا نجات دہندہ سمجھتے ہیں، ہمیشہ کشمیریوں کی منصفانہ جدوجہد کی حمایت کی ہے۔کشمیر کو تقسیم برصغیر کا نامکمل ایجنڈا قرار دیتے ہوئے الطاف حسین وانی نے کہا کہ اس تنازعے کے ایک اہم فریق کے طور پر پاکستان نے ہمیشہ اس کو اقوام متحدہ کی سلامتی کونسل کی قراردادوں کے مطابق پرامن طریقے سے حل کرنے پر آمادگی ظاہر کی ہے۔
