عالمی برادری کشمیر، فلسطین کے تنازعات کو حل کرے : شبیرشاہ

?️ 9 اکتوبر 2024

سرینگر:(سچ خبریں) نئی دہلی کی تہاڑ جیل میں غیرقانونی طورپرنظربند کل جماعتی حریت کانفرنس کے سینئر رہنما اور جموں و کشمیر ڈیموکریٹک فریڈم پارٹی کے چیئرمین شبیر احمد شاہ نے غزہ میں اسرائیلی جارحیت کی مذمت کرتے ہوئے فلسطینی عوام سے یکجہتی کا اظہار کیا ہے۔

کشمیر میڈیا سروس کے مطابق شبیرشاہ نے جیل سے ایک پیغام میں افسوس کا اظہار کیا کہ دنیا خاموش تماشائی بن کرظالم قوتوں کی طرف سے فلسطینیوں اور کشمیریوں پر ڈھائے جانے والے مظالم اور تباہی دیکھ رہی ہے۔انہوں نے کہا کہ کشمیر اور فلسطین ایک جیسی جدوجہد کررہے ہیں جن پر بھارت اور اسرائیلی استعمارمظالم ڈھارہے ہیں۔

ان متنازعہ علاقوں میں جاری فوجی جارحیت اور بنیادی حقوق سے محرومی اس بات کا تقاضا کرتی ہے کہ عالمی امن اور خوشحالی کے لیے ان تنازعات کو حل کیاجائے۔

حریت کانفرنس کے رہنما نے بی جے پی کی زیر قیادت بھارتی حکومت کی پالیسیوں خاص طور پر اگست 2019 کے بعد کشمیریوں کی شناخت کو مٹانے کی کوششوں کی شدید مذمت کی۔ انہوں نے کہا کہ بھارتی حکومت نے مقبوضہ علاقے میں آبادی کا تناسب تبدیل کر دیا ہے اور سرینگر، پلوامہ، اسلام آباد اور کولگام میں نئی کالونیاں قائم کی ہیں جو جموں و کشمیر کے مظلوم عوام کے لیے خطرہ ہیں۔حریت رہنمانے عالمی برادری پر زور دیا کہ وہ کشمیریوں اور فلسطینیوں کی حالت زارکا نوٹس لے اور تنازعات کے مزیدبڑھنے سے پہلے ان کو حل کرنے کے لیے فیصلہ کن اقدامات کرے۔ انہوں نے دنیا پر زوردیا کہ وہ کشمیر پر اپنی خاموشی توڑدے جہاں بھارت کی نسل پرست حکومت نے اسرائیلی طرز پر لوگوں کو بزورطاقت خاموش کرادیاہے۔