ایران سے جنگ کا انجام تلخ اور دردناک رہا:سابق صیہونی وزیر 

سچ خبریں:صیہونی وزیر سابق آویگدور لیبرمن نے ایران سے جنگ کے انجام کو اسرائیل کے لیے تلخ اور انتہائی دردناک قرار دیا، اور خبردار کیا کہ غیرمشروط جنگ بندی مستقبل میں بدترین حالات پیدا کرے گی۔

الجزیرہ نیوز چینل کی رپورٹ کے مطابق اسرائیل کے سابق وزیر اور دائیں بازو کی جماعت اسرائیل بیتنا (اسرائیل ہمارا گھر) کے سربراہ آویگدور لیبرمن نے ایران کے ساتھ حالیہ جنگ کے اختتام کو تل آویو کے لیے تلخ اور بہت ہی دردناک قرار دیا ہے۔

یہ بھی پڑھیں:اسرائیل نے ایران کے سامنے ہتھیار ڈال دیے ؛نیتن یاہو کو جنگ بندی پر مجبور ہونا پڑا

رپورٹ کے مطابق، لیبرمن نے واضح کیا کہ اگر یہ جنگ بندی کسی ٹھوس معاہدے کے بغیر برقرار رہی تو ہم آئندہ دو یا تین سال کے اندر، کہیں زیادہ بدتر حالات میں، ایک نئی جنگ کی طرف دھکیلے جائیں گے،انہوں نے کہا کہ ایران یورینیم کی افزودگی اور میزائل سازی کے اپنے منصوبے سے پیچھے ہٹنے کو تیار نہیں ہے۔

لیبرمن نے مزید کہا کہ ایران کا میزائل شہر بئرالسبع پر گرانا اسرائیل کے لیے نہایت تلخ اور اذیت ناک واقعہ تھا، تاہم، اس نے دعویٰ کیا کہ اسرائیل کو اس جنگ میں کچھ نمایاں فوجی کامیابیاں بھی حاصل ہوئی ہیں،ادھر صہیونی حکومت نے گزشتہ شب ایران کے مختلف شہروں بشمول تہران، ارومیہ، اور رشت میں غیر فوجی اہداف پر شدید اور بے مثال حملے کیے، جنہیں ایران کی مسلح افواج نے فوری اور مؤثر جوابی کارروائی سے جواب دیا۔

ایرانی ردِ عمل کے طور پر آج صبح کے ابتدائی اوقات میں، ایران نے صیہونی مقبوضہ علاقوں پر چھ دور کی میزائل کارروائیاں انجام دیں، جو شدت، دائرہ کار اور نقصانات کے لحاظ سے حالیہ ایام میں ایران کی سب سے غیر معمولی کارروائیاں سمجھی جا رہی ہیں،اس سے قبل ایران نے امریکی حملوں کے جواب میں قطر میں واقع امریکہ کے بڑے فوجی اڈے العدید کو بھی نشانہ بنایا۔

مزید پڑھیں:نیتن یاہو نے خوف اور کمزوری کے باعث جنگ بندی قبول کی:یمن نیوز

واضح رہے کہ العدید بیس دنیا میں امریکی فوجیوں کا سب سے گنجان آباد فوجی اڈہ ہے،ایران کے اس حملے کے بعد امریکی صدر ڈونلڈ ٹرمپ نے ایک التجائیہ بیان میں ایران و اسرائیل جنگ کے خاتمے کے لیے جنگ بندی کی اپیل کی،تاہم، اب تک یہ واضح نہیں ہو سکا کہ صیہونی حکومت، جسے لیبرمن نے فریبکار قرار دیا، اس اعلان کردہ جنگ بندی کی کس حد تک پابندی کرے گی،ایرانی وزیر خارجہ نے اپنے تازہ بیان میں واضح کیا ہے کہ اگر اسرائیل مزید کوئی حملہ نہیں کرتا، تو ایران بھی اپنے میزائل حملے روک دے گا۔