صیہونی حملوں میں ایران کے اسپتال اور ایمبولینسز کو نشانہ، متعدد امدادی کارکن شہید

سچ خبریں:ایرانی وزارت صحت کے مطابق، اسرائیل نے کرمانشاہ میں تین اسپتالوں اور چھ ایمبولینس گاڑیوں کو نشانہ بنایا، جس کے نتیجے میں دو امدادی کارکن شہید ہو گئے۔ ایران نے بین الاقوامی اداروں سے مداخلت کی اپیل کی ہے۔

ایران کے نائب وزیر صحت نے انکشاف کیا ہے کہ صہیونی ریاست نے نہ صرف ایران کے شہری مقامات کو نشانہ بنایا ہے بلکہ انسانی ہمدردی کی خدمات فراہم کرنے والے اداروں کو بھی حملوں کا نشانہ بنایا ہے۔

یہ بھی پڑھیں:ایران پر صیہونی حملے پر چین کا شدید ردعمل 

انہوں نے الجزیرہ ٹی وی کو انٹرویو دیتے ہوئے کہا کہ کرمانشاہ میں ہمارے تین اسپتال اسرائیلی حملوں کی زد میں آئے، جنہیں ہمیں مکمل طور پر خالی کرانا پڑا۔ یہ اقدام مریضوں اور طبی عملے کی حفاظت کے لیے اٹھایا گیا۔

نائب وزیر صحت نے مزید کہا کہ اسرائیلی حملوں میں چھ ایمبولینس گاڑیاں تباہ ہوئیں اور دو امدادی کارکن شہید ہو چکے ہیں، یہ حملے انسانی اور بین الاقوامی قوانین کی کھلی خلاف ورزی ہیں۔

انہوں نے خبردار کیا کہ ایران ہر قسم کی ایٹمی آلودگی سے نمٹنے کے لیے تیار ہے، اگر صہیونی ریاست نے ایرانی جوہری تنصیبات کو نشانہ بنانے کی کوشش کی۔

مزید پڑھیں:صیہونی حملے کے بعد تہران کی صورتحال؛روسی تجزیہ کار کی زبانی

ان کا کہنا تھا کہ بین الاقوامی ادارے، خاص طور پر اقوام متحدہ اور عالمی صحت تنظیم کو چاہیے کہ اسرائیل پر دباؤ ڈالیں تاکہ وہ عام شہریوں اور طبی اداروں پر حملے بند کرے۔