امریکہ کا کیوبا کے رہنما پر الزام، فوجی مداخلت کا بہانہ ہے: ہوانا

سچ خبریں:کیوبا کے صدر میگل ڈیاز کانل نے زور دے کر کہا ہے کہ امریکہ کی طرف سے کیوبا کے انقلابی رہنا راول کاسترو پر لگائے گئے الزامات مکمل طور پر سیاسی اور بدنیتی پر مبنی اقدام ہیں، جن کی کوئی قانونی بنیاد نہیں ہے۔

کانل نے واضح کیا کہ یہ بے بنیاد الزامات واشنگٹن کی اس کی قلدری کے عروج کی عکاسی کرتے ہیں اور ساتھ ہی کیوبا کے انقلاب کی استقامت اور اس کی قیادت کے اتحاد کے سامنے اس کی مایوسی اور ناامیدی کو ظاہر کرتے ہیں۔

کیوبا کے صدر نے آخر میں انکشاف کیا کہ وائٹ ہاؤس کی طرف سے اس من گھڑت کیس کو بڑھا چڑھا کر پیش کرنے کا واحد مقصد کیوبا کی سرزمین پر فوجی مداخلت کے لیے راہ ہموار کرنا اور اس کے لیے بہانہ فراہم کرنا ہے۔

اس سے قبل بھی ان کا کہنا تھا کہ ہوانا کو جو کچھ بھی برداشت کرنا پڑ رہا ہے، وہ امریکا کے اقدامات کی وجہ سے ہے جس کا مقصد مقامی معیشت کا گلا گھونٹنا ہے۔

کانل نے مزید کہا کہ کیوبا کو ایندھن کی فراہمی پر پابندیوں میں نرمی کے دعوے جھوٹے اور بے بنیاد ہیں۔

کیوبا کے صدر نے یہ بھی کہا کہ امریکا بار بار بغیر کسی معقول دلیل کے غلط معلومات پھیلاتا ہے۔ موجودہ بحران کی ذمہ داری ان لوگوں پر عائد ہوتی ہے جنہوں نے ہوانا کے خلاف تمام مادی اور مالی وسائل تک رسائی بند کرنے کا حکم دیا ہے۔ امریکا کے تعزیری اقدامات میں ان ممالک اور کمپنیوں پر دباؤ ڈالنا بھی شامل ہے جو کیوبا کے ساتھ توانائی کے شعبے میں معاملات کرتی ہیں۔

کانل نے مزید کہا کہ واشنگٹن نے تاریخ کے مختلف مراحل میں جھوٹ کی بنیاد پر طاقت اور دباؤ کا استعمال کیا ہے۔

یہ بیانات ایسے وقت میں سامنے آئے ہیں جب چند گھنٹے قبل امریکی صدر ڈونلڈ ٹرمپ نے اپنے ایک بیان میں دعویٰ کیا تھا کہ ہم کیوبا کو آزاد کروا رہے ہیں۔

انہوں نے ایسے وقت میں جب وہ کیوبا کو ناکہ بندی میں جکڑے ہوئے ہیں اور اسے ایندھن کی فراہمی کی اجازت نہیں دیتے، یہ بھی کہا کہ ہمیں کیوبا کے عوام کی مدد کرنی چاہیے؛ ان کے پاس نہ خوراک ہے اور نہ توانائی، لیکن وہ عظیم لوگ ہیں۔