ملک میں سیاسی استحکام کیسے آئے گا؟؛ شاہ محمود قریشی

🗓️ 10 اگست 2024

سچ خبریں: پاکستان تحریک انصاف کے مرکزی رہنما شاہ محمود قریشی نے کہا ہے کہ بانی پی ٹی آئی عمران خان کی سیاسی حقیقت کو تسلیم کیے بغیر ملک میں سیاسی استحکام ممکن نہیں ہے۔

کوٹ لکھپت جیل میں صحافیوں سے غیر رسمی گفتگو کے دوران شاہ محمود قریشی نے کہا کہ وہ 40 سال سے سیاست میں ہیں، لیکن ان کے خلاف 39 سال تک کوئی مقدمہ درج نہیں ہوا۔

یہ بھی پڑھیں: قید میں رہ کر میدان سیاست کا ہیرو

تاہم، گزشتہ ایک سال میں ان پر درجنوں مقدمات بنا دیے گئے ہیں۔

ایک سوال کے جواب میں انہوں نے کہا کہ چاہے کسی کو یہ بات پسند آئے یا نہ آئے۔

انہوں نے کہا کہ بانی پی ٹی آئی ایک سیاسی حقیقت ہیں، اور ان کی سیاسی حقیقت کو تسلیم کیے بغیر ملک میں سیاسی استحکام نہیں آسکتا۔

شاہ محمود قریشی نے نواب اکبر بگٹی کے ساتھ ہونے والے واقعات کو ظلم قرار دیتے ہوئے کہا کہ اکبر بگٹی پاکستان مخالف نہیں تھے، اور ایک دوسرے کو غدار کہنے کا سلسلہ بند ہونا چاہیے۔

انہوں نے مزید کہا کہ 75 سال سے غداری کے سرٹیفکیٹ بانٹے جا رہے ہیں۔

مزید پڑھیں: پاکستان کی حکومت کتنی چلے گی؟

انہوں نے اس بات پر زور دیا کہ محمود خان اچکزئی ایک جمہوریت پسند ہیں، اور جو شخص جمہوری اور آئینی سوچ رکھتا ہو، وہ غدار نہیں ہو سکتا۔

انہوں نے مزید کہا کہ بلوچستان میں امن و امان کا راستہ مذاکرات سے ہو کر ہی گزرتا ہے۔