فواد چوہدری کا ایک بار پھر معافی مانگنے کا اعلان؛ کیوں؟

?️ 7 اگست 2024

سچ خبریں: الیکشن کمیشن کے ممبر نثار درانی کی سربراہی میں 4 رکنی بینچ نے بانی پی ٹی آئی اور فواد چوہدری کے خلاف چیف الیکشن کمشنر اور الیکشن کمیشن کی توہین کے کیس کی سماعت کی۔

سماعت کے دوران، وکیل فیصل چوہدری نے کہا کہ بانی پی ٹی آئی کے وکیل شعیب شاہین ہائی کورٹ میں مصروف ہیں۔

انہوں نے مزید کہا کہ الیکشن کمیشن نے دو احکامات جاری کیے، جو دونوں اسلام آباد ہائی کورٹ میں چیلنج ہوئے ہیں۔

یہ بھی پڑھیں: فواد چوہدری کا پی ٹی آئی اور اسٹیبلشمنٹ کے مذاکرات پر حیرانی کا اظہار

فیصل چوہدری نے کہا کہ ہائی کورٹ کے فیصلے کی کاپی فراہم کر رہا ہوں، الیکشن کمیشن نے چارج فریم کیا تھا، جسے ہائی کورٹ نے معطل کر دیا ہے۔

بانی پی ٹی آئی اور فواد چوہدری کے کیس میں ایک کیس کا فیصلہ دوسرے پر بھی لاگو ہوگا، لہذا بانی پی ٹی آئی کے کیس پر بھی چارج فریم کو دوبارہ جائزہ لیں۔

سماعت کے دوران، فواد چوہدری نے کہا کہ ہم معافی تلافی کرنے والے لوگ ہیں اور میں ایک تحریری معذرت نامہ دینا چاہتا ہوں۔

ممبر کمیشن نے کہا کہ آپ نے بھی نہیں سوچا تھا کہ آگے کیا ہوگا، آپ معافی نامہ دے دیں۔

فواد چوہدری نے کہا کہ آپ کی پوسٹ پر یہ سب ہوتا ہے، کیپٹن صفدر نے کیا کہا اور کیا کیا، میں نہیں کہتا کہ اسے بھی نوٹس دیں، لیکن آپ کا دل ہم پر زیادہ آتا ہے، آپ تگڑے ایکشن لیں تو ساکھ واپس آئے گی، آپ پی ٹی آئی کو 41 سیٹیں دے دیں۔

ممبر کمیشن نے جواب دیا کہ اگر نشستیں پی ٹی آئی کی بنیں گی تو ضرور دی جائیں گی، چارج فریم کے لیے کیس رکھا جاتا ہے، آپ اپنا جواب جمع کرا دیجیے۔

سماعت کے دوران، وکیل فیصل چوہدری نے کہا کہ ہائی کورٹ کا آرڈر چارج فریم سے متعلق ہے اور اسے تسلی سے پڑھ لیں۔ انہوں نے وضاحت کی کہ ہائی کورٹ کا حکم جیل ٹرائل اور چارج فریم معطل کرنے سے متعلق ہے۔

مزید پڑھیں: فواد چوہدری کو بیرون ملک جانے کی عارضی اجازت اور ان کا ردعمل

فواد چوہدری نے کہا کہ چارج فریم اچھی خبر نہیں بنتی، لہذا آپ مزید کارروائی تک کیس ملتوی کر دیں۔

ممبر کمیشن نے جواب دیا کہ سیاستدان کا کام گالی دینا نہیں ہوتا، آپ لوگوں کو دیکھ کر بہت آگے بڑھ جاتے ہیں، اور اس وقت آپ سخت جذباتی تھے۔

الیکشن کمیشن نے کیس کی سماعت 4 ستمبر تک ملتوی کر دی۔