بیرسٹر سیف نے پیٹرول اور بجلی کی قیمتوں کے بارے میں مریم نواز کو انہیں کی بات یاد دلا دی

🗓️ 2 جولائی 2024

سچ خبریں: بیرسٹر سیف نے پیٹرول اور بجلی کی قیمتوں میں اضافے سے متعلق مریم نواز کا بیان دہراتے ہوئے کہا کہ آپ نے کہا تھا کہ جب پیٹرول اور بجلی مہنگا ہو جائے تو سمجھ لو ملک کا وزیراعظم چور ہے۔

مشیر اطلاعات خیبر پختونخوا بیرسٹر سیف نے مریم نواز کا بیان دہراتے ہوئے کہا ہے کہ "راج کماری کا قول ہے کہ جب پیٹرول اور بجلی مہنگا ہو جائے تو سمجھ لو ملک کا وزیراعظم چور ہے۔

یہ بھی پڑھیں: عیدالفطر سے قبل پیٹرول کی قیمت 290 روپے فی لیٹر تک پہنچنے کا امکان

حکومت کی جانب سے پیٹرولیم مصنوعات کی قیمتوں میں اضافے پر ردعمل دیتے ہوئے بیرسٹر سیف نے کہا کہ آئی ایم ایف کے تیار کردہ وفاقی بجٹ کے اثرات پہلے دن سے ہی عوام پر ظاہر ہونا شروع ہوگئے ہیں۔ جعلی حکومت نے مالی سال کے پہلے ہی دن عوام پر پیٹرول بم گرا دیا۔

انہوں نے مزید کہا کہ مریم نواز نے اپنے چچا شہباز شریف کے چور ہونے کی تصدیق کر دی ہے۔ "راج کماری کا قول ہے کہ جب پیٹرول اور بجلی مہنگی ہو جائے تو سمجھ لو ملک کا وزیراعظم چور ہے۔” پیٹرول اور بجلی دونوں کی قیمتیں آسمان کو چھو رہی ہیں۔

مزید پڑھیں: پیٹرولیم لیوی میں فی لیٹر 20 روپے تک اضافے کا امکان

بیرسٹر سیف نے کہا کہ نواز شریف کہا کرتے تھے کہ رات کے اندھیرے میں پیٹرول مہنگا کرنا عوام کی جیبوں پر ڈاکا ڈالنے کے مترادف ہے۔ پیٹرول کی نئی قیمتوں سے پہلے سے بے قابو مہنگائی اب مزید بے لگام ہو جائے گی۔ یہ تو آئی ایم ایف بجٹ کی شروعات ہے، آگے آگے دیکھئے ہوتا ہے کیا۔ عوامی مینڈیٹ سے منتخب حکومت عوامی مفادات کو مدنظر رکھ کر فیصلے کرتی ہے، جب کہ مینڈیٹ چور حکومت کو عوام کی کوئی فکر نہیں ہے۔