بلوچستان کی کابینہ کی تقریب حلف برداری 7 نومبر بروز اتوار گورنر ہاؤس کوئٹہ میں ہوگی

🗓️ 6 نومبر 2021

کوئٹہ (سچ خبریں) تفصیلات کے مطابق ترجمان گورنر ہاوس کی جانب سے جاری بیان میں بتایا گیا کہ بلوچستان کی نئی صوبائی کابینہ کی تقریب حلف برداری 7 نومبر بروز اتوار گورنر ہاؤس کوئٹہ میں ہوگی۔ گورنر بلوچستان سید ظہور احمد آغا نئی صوبائی کابینہ میں شامل وزراء سے حلف لیں گے، تقریب حلف برداری میں وزیراعلیٰ بلوچستان میرعبد القدوس بزنجو سمیت اعلیٰ سول و ملٹری حکام شرکت کریں گے۔
ترجمان بلوچستان عوامی پارٹی سردار عبدالرحمان کھیتران کے مطابق اٹھارویں ترمیم کے بعد کابینہ میں 14 وزیر ہوں گے جو بروز اتوار گورنر ہاوس میں حلف اٹھائیں گے، بلوچستان کابینہ میں پانچ مشیر بھی شامل ہوں گے۔

میڈیا رپورٹس میں مزید بتایا گیا کہ سردار عبدالرحمان کھیتران کے مطابق تمام اتحادیوں سے مشاورت مکمل ہو گئی ہے، جس میں تمام معاملات خوش اسلوبی سے طے پا گئے ہیں۔

انہوں نے کہا کہ ہمارے درمیان کوئی اختلافات نہیں ہیں جس طرح وزیراعلیٰ اور اسپیکر کو منتخب کیا گیا ہے اس ہی طرح صوبائی کابینہ کا فیصلہ بھی خوش اسلوبی سے انجام پائے گا۔ یہاں یہ بات قابل ذکر ہے کہ گذشتہ ماہ 25 اکتوبر کو میر عبدالقدوس بزنجو نے اسپیکر اسمبلی کے عہدے سے استعفیٰ دیا تھا جبکہ اس سے ایک روز قبل جام کمال وزیراعلیٰ بلوچستان کے عہدے سے مستعفی ہوئے تھے۔
جام کمال کے عہدہ نہ چھوڑنے پر ناراض اراکین نے اپوزیشن کے ساتھ مل کر ان کے خلاف ایک تحریک عدم اعتماد جمع کروائی تھی جو وزیراعلیٰ بلوچستان کے مستعفی ہونے کے بعد واپس لے لی گئی تھی۔ 29 اکتوبر کو کوئٹہ میں گورنر ہاؤس وزیراعلیٰ بلوچستان کی تقریب حلف برداری ہوئی۔تقریب میں اراکین قومی وصوبائی اسمبلی اور سینیٹرز شریک ہوئے۔ گورنر بلوچستان ظہور آغا نے وزیراعلیٰ بلوچستان میر عبدالقدوس بزنجو سے حلف لیا۔ بلوچستا ن عو امی پارٹی کے رکن سابق اسپیکربلوچستان اسمبلی میر عبدالقدوس بزنجو بلوچستان کے 17ویں وزیراعلیٰ منتخب ہوئے تھے۔