ہم نے اپنی سیاست نہیں، ریاست بچائی ہے۔ طلال چودھری

?️ 18 جنوری 2026

گوجرہ (سچ خبریں) وفاقی وزیر مملکت داخلہ طلال چودھری نے کہا ہے کہ ہم نے اپنی سیاست نہیں بچائی بلکہ ریاست بچائی۔

پنجاب کے علاقے گوجرہ میں نجی تقریب سے خطاب کرتے ہوئے طلال چودھری کا کہنا تھا کہ جب تک لوگ اپنے فیصلے تول کر اور میرٹ پر نہیں کریں گے آپ کی تقدیر نہیں بدلے گی، پنجاب ترقیاتی کاموں میں اب سب سے آگے ہے۔

اُنہوں نے کہا کہ پنجاب میں کوڑا کرکٹ لوگوں کے گھروں سے اٹھایا جاتا ہے، کراچی، پشاور، کوئٹہ سے کوئی نہیں اٹھاتا، پنجاب میں کوئی کچے پکے کا ڈاکو نہیں ہے جو جرم کرتا ہے انجام کو پہنچتا ہے، پنجاب کے ہر علاقے میں کارپٹ سڑکوں کا جال ہے باقی کسی صوبے میں نہیں ہے۔

وفاقی وزیر مملکت کا کہنا تھا کہ پنجاب میں امن ہے لوگ بے فکر گھروں میں رہتے اور سفر کرتے ہیں، پنجاب میں تھانے نہیں بکتے، سوشل میڈیا پر اپنی رائے لکھتے ہوئے موازنہ کر لیا کریں، پی ڈی ایم کی حکومت میں مہنگائی ضرور ہوئی۔

طلال چودھری نے مزید کہا کہ ہم نے اپنی سیاست نہیں بچائی بلکہ ریاست بچائی، پچھلے دو اڑھائی سال میں معاشی حالات بہت بہتر ہوئے آئندہ مزید بہتر ہوں گے، ہمارے کام کو نعروں سے نہیں دوسروں سے موازنہ کرکے ووٹ دیا کریں۔