کے پی حکومت کی سرپرستی میں لوگوں کی جانیں ضائع ہو رہی ہیں۔ عظمی بخاری

?️ 17 فروری 2026

لاہور (سچ خبریں) وزیر اطلاعات پنجاب عظمیٰ بخاری کا رہنما پی ٹی آئی مزمل اسلم کے بیان پر ردعمل آگیا۔

عظمیٰ بخاری نے اپنے بیان میں کہا ہے کہ خیبر پختونخواہ میں گزشتہ 5 روز سے صوبے کی مختلف سڑکیں بند ہیں، صوبے کی سڑکوں کی بندش سے کئی ایمبولینس ٹریفک میں پھنس چکی ہیں، بانی پی ٹی آئی کی آنکھ کی وجہ سے ایمبولینسوں میں لوگ مر رہے ہیں۔

ان کا کہنا تھا کہ صوبائی حکومت کی سرپرستی میں لوگوں کی جانیں ضائع ہو رہی ہیں، خیبر پختونخواہ حکومت کے لیے لوگ نہیں بانی پی ٹی آئی کی آنکھ اہم ہے، مریم نواز سے کارکردگی میں مقابلہ کرنے کا آپ سوچ بھی نہیں سکتے، مریم نواز کی حکومت پنجاب کے ہر ضلع ہر تحصیل اور یونین کونسل تک سہولیات پہنچا رہی ہے۔

عظمیٰ بخاری نے کہا کہ کے پی حکومت کی رٹ پشاور میں نہیں ہے مردان، چترال اور کرم تو بہت دور کی بات ہیں، کے پی حکومت کیلئے بانی پی ٹی آئی کے نام پر جلسے کرنا سڑکیں بند کرنا اور دھرنے دینا اہم ہے، اپنے لوگوں کی جانیں بچانا اور ان کے مسائل حل کرنا کے پی حکومت کی ترجیحات نہیں ہے۔

مزید برآں، ان کا کہنا تھا کہ جھوٹے بیانیے اور پروپیگنڈے کی ناکامی کے بعد اب "آنکھ کارڈ” کھیلا جا رہا ہے، ایک آنکھ 6/9 دوسری آنکھ 6/6 ہے، بانی پی ٹی آئی کو گھڑی اور اسکی سوئیاں بھی دکھ رہی ہیں۔