اسلام آباد(سچ خبریں) مقبوضہ کشمیر میں بھارتی افواج کے ہاتھوں بے گناہ کشمیریوں کے قتل جاری ہے ، پاکستان نے بھارتی فوج کے ہاتھوں 5 مزید کشمیریوں کی ماورائے عدالت قتل کی شدید الفاظ میں مذمت کرتے ہوئے ایک بار پھر عالمی ضمیر کو جھنجھوڑا ہے عالمی برادری بھارتی دہشت گردی کا فوری نوٹس لے۔
ترجمان دفتر خارجہ نے اپنے بیان میں کہا ہے کہ بھارتی افواج کے ہاتھوں بےگناہ کشمیریوں کے قتل کا سلسلہ جاری ہے، گزشتہ ماہ سے جعلی مقابلوں، نام نہاد سرچ آپریشن میں 30 کشمیری شہید ہوچکے، شہید کشمیریوں کی میتیں ورثا کے حوالے نہ کرنا قابل مذمت ہے۔
ترجمان نے کہا کہ مقبوضہ کشمیر میں شہری بھارتی ریاستی دہشت گردی سے محفوظ نہیں، پاکستان نے حال ہی میں ڈوزیئر میں حقائق فراہم کیے تھے، کشمیریوں کا قتل ناقابل تردید حقائق کی بھی توثیق کرتا ہے، عالمی برادری بھارت کی ریاستی دہشت گردی کا فوری نوٹس لے۔
ترجمان کا مزید کا کہنا تھا کہ عالمی برادری اقوام متحدہ کی سلامتی کونسل کی متعلقہ قراردادوں اور کشمیریوں کی خواہشات کے مطابق کشمیر کا مسئلہ حل کرنے کےلیے کردار ادا کرے۔واضح رہے کہ مقبوضہ کشمیر میں بھارتی فورسز کی ریاستی دہشتگردی عروج پر ہے ، جہاں مزید پانچ کشمیری نوجوانوں کو شہید کردیا گیا ہے۔
کشمیرمیڈیا سروس کے مطابق پانچ کشمیری نوجوانوں کوضلع کلگام میں نام نہاد سرچ آپریشن کی آڑ میں شہید کیا گیا۔بھارتی فوج نے کلگام اورقریبی علاقوں کی ناکہ بندی کرکے لوگوں کوگھروں میں محصورکیا موبائل اورانٹرنیٹ سروس بھی بند کردی گئی۔
