کراچی: سندھ لیبر اپیلٹ ٹربیونل نے پاکستان اسٹیل کے5744 ملازمین کو بحال کردیا

?️ 17 اپریل 2025

کراچی: (سچ خبریں) سندھ لیبر اپیلٹ ٹربیونل نے لیبر کورٹ کافیصلہ معطل کرتے ہوئے پاکستان اسٹیل کے 5744 ملازمین کو بحال کردیا۔

ڈان نیوز کے مطابق سندھ لیبراپیلٹ ٹربیونل نے پاکستان اسٹیل کی انتظامیہ کو 14 مئی کے لیے نوٹس جاری کردیے۔

پاکستان اسٹیل کی انتظامیہ نے ملازمین کو فارغ کرکےلیبر کورٹ میں کیس دائر کیا تھا، لیبر کورٹ نے 22 فروری کو پاکستان اسٹیل انتظامیہ کی درخواست منظورکرلی تھی۔

درخواست گزار کے وکیل کے مطابق پاکستان اسٹیل کا آڈٹ کرنے والےگواہوں کاریکارڈ ہی غائب ہے، اگرپاکستان اسٹیل نقصان میں جارہی ہے تو اسی جگہ نئی اسٹیل مل کا منصوبہ کیوں بنایاگیا ہے۔

واضح رہے کہ ڈان نیوز گزشتہ سال ستمبر میں ڈان نیوز نے باوثوق ذرائع کے حوالے سے بتایا تھا کہ وفاقی حکومت نے کراچی میں نئی اسٹیل ملز قائم کرنے کا منصوبہ تیار کیا ہے اور اس کے قیام کے لیے 700 ایکڑ اراضی مختص کردی گئی ہے۔

ذرائع نے بتایا تھا کہ پاکستان اسٹیل ملز کی اراضی ہی نئی اسٹیل ملز کے لیے مختص کی گئی ہے کیونکہ موجودہ اسٹیل ملز کی اراضی پر نئی اسٹیل ملز قائم کرنے کی تجویز دی گئی تھی۔

حکومت روس کے تعاون سے نئی اسٹیل مل قائم کرنا چاہتی ہے اور روس کے نائب وزیر صنعت و تجارت اور پاکستان کے وزیر صنعت نے نئی اسٹیل مل کے قیام پر اتفاق کر لیا ہے۔

روسی نائب وزیر صنعت و پیداوار نے اپنی حکومت میں اعلیٰ سطح پر نئی اسٹیل مل کی تجویز پیش کرنے پر اتفاق کیا۔

یاد رہے کہ پاکستان اسٹیل ملز جون 2015 سے بند ہے اور اس کی نجکاری کی تجاویز بھی کئی بار پیش کی جا چکی ہے۔