چیلنجز کے باوجود معیشت مضبوط ہورہی ہے:وزیراعظم

?️ 8 جنوری 2022

اسلام آباد(سچ خبریں)عالمی وباء کورونا وائرس نے دنیا میں معیشت کو کافی کمزور بنا دیا ہے تاہم وزیراعظم کا کہنا ہے کہ کورونا کے باعث پیدا ہونیوالے چیلنجز کے باوجود معیشت مضبوط ہو  رہی ہے ملازمتوں کے مواقع پیدا ہورے ہیں گزشتہ 9 ماہ کے دوران رجسٹرڈ کاروباروں کے منافع میں 59 فیصد اضافہ ہوا ہے۔

تفصیلات کے مطابق سماجی رابطے کی ویب سائٹ ٹوئٹر پر جاری پیغام میں وزیراعظم عمران خان نے کرونا کے باعث پیدا ہونیوالے چیلنجز کے باوجود کاروباری شرح میں اضافہ ہوا،گزشتہ 9 ماہ کے دوران رجسٹرڈ کاروباروں کے منافع میں 59 فیصد اضافہ ہوا، جس سے ظاہرہوتا ہے کہ معیشت مضبوط ہو رہی ہے، ملازمتوں کے مواقع پیدا ہو رہے ہیں۔

وزیراعظم نے اپنے ٹوئٹ میں اس امید کا اظہار کیا کہ کاروباری ادارے ان فوائد کو اپنی افرادی قوت کےساتھ بانٹیں گے۔گذشتہ روز وزیرخزانہ نے ملک کی ترقی اورخوشحالی میں ٹیکس کی اہمیت کو اجاگرکرتے ہوئے کہا تھا کہ ٹیکسوں کے بغیرملک کی ترقی اورخوشحالی ممکن نہیں ہے، پاکستان کی 22 کروڑ کی آبادی میں صرف 30 لاکھ افراد ٹیکس ریٹرن فائل کرتے ہیں جس میں ایک ملین کے قریب تنخواہ دار بھی شامل ہیں۔

وزیر خزانہ نے وزیراعظم عمران خان مسٹر کلین قرار دیتے ہوئے کہا کہ میں اپنے منصب کی تنخواہ بھی نہیں لے رہا، ہمیں قوم کا درد ہے، 22 کروڑ عوام کی خدمت حکومت تب کرسکتی ہے جب تمام اہل ٹیکس گزار اپنا ٹیکس جمع کرائیں۔انہوں نے کہا کہ رواں سال جی ڈی پی کے تناسب سے ٹیکسوں کو11.5 فیصد کی سطح پرلے جانا ہمارا ہدف ہے۔