اسلام آباد(سچ خبریں) وفاقی وزیر اطلاعات ونشریات چوہدری فوادحسین نے پیپلزپارٹی اور مسلم لیگ (ن) کی قیادت کی ملاقات کوعمران خا ن کی دشمنی میں ایک اکٹھ قرا رد ے دیا اور کہاکہ عمران خان کی دشمنی میں یہ سب اکٹھے ہیں، ایسی ملاقاتوں سے نہ ہمیں پہلے کوئی فرق پڑا ہے نہ اب کوئی فرق پڑے گا، پی ڈی ایم پاکستان کی ڈھیلی ڈھالی موومنٹ اور جرائم پیشوں کا گینگ ہے، ایک دن کچھ اور دوسرے دن کچھ ہوتی ہے،شہباز شریف نے تو پیٹ پھاڑ کر آصف علی زرداری سے قوم کے لوٹے ہوئے پیسے نکلوانے تھے لیکن جن لوگوں کی عزت نفس نہ ہو ان کی صورتحال کچھ اسی طرح رہتی ہے، پہلے دن سے کہہ رہے تھے کہ یہ لوگ کبھی علیحدہ نہیں ہیں ۔
وفاقی وزیر اطلاعات فواد چوہدری کا میڈیا کو بریفنگ دیتے ہوئے کہنا تھا کہ وزیراعظم عمران خان نے صدر شی جن پنگ کی جانب سے دیئے گئے ظہرانے میں شرکت کی اور وفد کے ہمراہ چین کے وزیراعظم لی کی چیانگ سے ملاقات کی ہے،وزیراعظم کی ازبکستان کے صدر شوکت مرزایوف سے بھی ملاقات ہوئی، ان تینوں ملاقاتوں میں عالمی معاملات پر تبادلہ خیال ہوا۔
انھوں نے کہا کہ چین کے وزیراعظم اور ازبکستان کے صدر کے ساتھ کشمیر اور افغانستان پر سیر حاصل گفتگو ہوئی ہے ،چین کے وزیراعظم نے یقین دہانی کرائی ہے کہ وہ کشمیر کے مسئلہ پر پاکستان کے ساتھ کھڑا ہے،عالمی برادری پاکستان کے موقف کی مکمل حمایت کرتی ہے اور چین اس موقف پر پاکستان کے ساتھ ہے۔ فواد چوہدری نے کہا کہ پاکستان نے چین کو تائیوان اور ہانگ کانگ جیسے اہم مسائل پر اپنی حمایت کا یقین دلایا ہے،چین نے معاشی اور سیکورٹی معاملات میں ہمیشہ پاکستان کا ساتھ دیا ہے۔