پاکستان ایشیائی ترقیاتی بینک سے 140 ارب روپے کا نیا قرض لے گا

?️ 15 مارچ 2026

اسلام آباد (سچ خبریں) وفاقی ریٹائرڈ ملازمین کے پنشن اخراجات ایک ہزار پچپن ارب روپے تک پہنچ گئے، حکومت نے اخراجات پر قابو پانے کیلئے ایشیائی ترقیاتی بینک سے ایک سو چالیس ارب روپے کا نیا قرض لینے کا فیصلہ کرلیا، پاکستان نے اے ڈی بی کو 50 کروڑ ڈالر کے مساوی قرض کی تجویز دیدی۔

حکام وزارت خزانہ کے مطابق مجوزہ قرض کا بنیادی مقصد سرکاری پنشن نظام میں اصلاحات کرنا ہے، وفاقی حکومت کا سالانہ پنشن بل ایک ہزار پچپن ارب روپے تک پہنچ گیا، نئے قرض کا مقصد سرکاری پنشن اخراجات پر قابو پانا ہے، منصوبے کا نام ٹرانسفارمنگ پبلک سیکٹر پنشن پروگرام رکھا گیا ہے۔

دستاویز کے مطابق سرکاری اداروں کے لیے تربیت اور آگاہی پروگرام شروع کیا جائے گا، پنشن نظام میں گورننس اور نگرانی کا نظام مضبوط بنانے کی تجویز ہے، نئی اصلاحات سے مستقبل کے مالی بوجھ میں کمی متوقع ہے۔

حکام وزارت خزانہ کا کہنا ہے کہ پنشن نظام کو زیادہ مستحکم اور شفاف بنایا جائے گا، پنشن کے لیے نیا اور پائیدار نظام متعارف کرانے کی تیاری ہے، طے شدہ کنٹری بیوٹری پنشن اسکیم کی نگرانی بہتر بنائی جائے گی۔