پاکستان، یورپی یونین کے ساتھ مضبوط تعلقات چاہتا ہے:آرمی چیف

?️ 18 مئی 2021

اسلام آباد(سچ خبریں) آرمی چیف جنرل قمر جاوید باجوہ نے کہا ہے کہ پاکستان، یورپی یونین کے ساتھ مضبوط تعلقات چاہتا  ہے۔ یورپی یونین کی سفیر اینڈرولا کامینار نے خطے میں امن اور استحکام کے لیے خصوصاً افغان امن عمل کے لیے پاکستان کی کوششوں کو سراہا۔

رپورٹ میں پاک فوج کے شعبہ تعلقات عامہ ‘آئی ایس پی آر’ کا حوالہ دے کر بتایا گیا کہ جنرل ہیڈ کوارٹرز میں یورپی یونین کی سفیر اینڈرولا کامینار سے ملاقات میں جنرل قمر جاوید باجوہ نے کہا کہ ‘پاکستان یورپی یونین کے ساتھ اپنے تعلقات کو قدر کی نگاہ سے دیکھتا ہے اور ہم باہمی مفاد پر مبنی کثیر جہتی دوطرفہ تعلقات کو فروغ کے منتظر ہیں۔

خیال رہے کہ گزشتہ ماہ پاکستان میں فرانس مخالف مظاہرے اور فرانسیسی سفیر کو ملک بدر کرنے کے مطالبے سے یورپی یونین کے ساتھ پاکستان کے تعلقات کے بارے میں سوالات اٹھائے گئے تھے۔بعدازاں فرانس مخالف مظاہرے کی قیادت کرنے والے گروپ کے ساتھ حکومت کے معاہدوں سے ان شکوک و شبہات میں اضافہ ہوا تھا۔

آرمی چیف کے تبصرے کو ان خدشات کو دور کرنے کے تناظر میں دیکھا گیا ہے۔آئی ایس پی آر کے مطابق ملاقات کے دوران افغان امن عمل میں حالیہ پیشرفت سمیت علاقائی سلامتی کی صورتحال پر تبادلہ خیال کیا گیا۔

بعد ازاں یورپی یونین کے سفیر نے وفاقی وزیر اطلاعات و نشریات فواد چوہدری سے بھی ملاقات کی۔ملاقات کے دوران وفاقی وزیر نے غزہ میں بگڑتی ہوئی انسانی صورتحال پر پاکستان کی گہری تشویش کا اظہار کیا۔