پاکستان، اٹلی مشترکہ اقتصادی کمیشن کے اجلاس کی میزبانی کے منتظر ہیں۔ عطا تارڑ

?️ 2 جون 2025

اسلام آباد (سچ خبریں) وزیر اطلاعات عطا تارڑ نے کہا ہے پاکستان، اٹلی مشترکہ اقتصادی کمیشن کے آئندہ اجلاس کی میزبانی کے منتظر ہیں۔

تفصیلات کے مطابق تقریب سے خطاب کرتے ہوئے عطار تارڑ نے کہا کہ اٹلی کے قومی دن کی تقریب میں شرکت پرخوشی ہوئی، حکومت اور عوام کی جانب سےاٹلی کے عوام کو مبارکباد دیتا ہوں۔ انہوں نے کہا کہ تجارت، سرمایہ کاری اورتعلیم کے شعبے میں دونوں ملکوں کےبہترین تعلقات ہیں، دونوں ملکوں کے 75 سال پر محیط سفارتی تعلقات ہیں، علاقائی کشیدگی کے باوجود اٹلی کے وزیر داخلہ کا دورہ تعلقات کی مضبوطی کی عکاسی کرتا ہے۔

ذرائع کے مطابق وزیراطلاعات عطا تارڑ کا کہنا تھا کہ دونوں ملک سیاسی اور اقتصادی معاملات میں باقاعدہ مکالمے کے خواہاں ہیں، پاکستان، اٹلی مشترکہ اقتصادی کمیشن کے آئندہ اجلاس کی میزبانی کے منتظر ہیں۔ اٹلی پاکستان کا تجارت اور معیشت کے میدان میں اہم شراکت دار ہے، دوطرفہ تجارت کا حجم ایک ارب ڈالر سے تجاوز کرنا خوش آئند ہے، اٹلی یورپی یونین میں پاکستانی طلبا کے لیے ایک پرکشش مقام بن چکا ہے۔

انہوں نے کہا کہ 3500 پاکستانی طلبا اس وقت اٹلی میں تعلیم حاصل کررہے ہیں، باہمی فائدہ مند شراکت داری کو مضبوط بنانے میں اٹلی کی سفیر کی انتھک کوششیں قابل ستائش ہیں۔