وزیر دفاع کی سی ایم ایچ سیالکوٹ آمد، بھارتی جارحیت میں زخمی افراد کی عیادت

🗓️ 14 مئی 2025

سیالکوٹ (سچ خبریں) وزیر دفاع خواجہ محمد آصف کی سی ایم ایچ سیالکوٹ آمد ہوئی، وزیر دفاع خواجہ آصف نے پاک بھارت کشیدگی کے دوران زخمی ہونے والے افراد کی عیادت کی۔

تفصیلات کے مطابق خواجہ آصف کے ہمراہ میجر جنرل عمران خان بابر تھے، خواجہ آصف کو زیرعلاج زخمیوں کی صحت کے حوالے سے آگاہ کیا گیا۔ وزیر دفاع خواجہ آصف نے کہا کہ میرے لئے اعزاز کی بات ہے جوانوں کے پاس آیا ہوں جو دفاع پاکستان میں زخمی ہوئے، ہمارے جوان بہادری سے بارڈر پر لڑے ہیں، ہماری ایک چیک پوسٹ پر سو سے زائد گولے پھینکے گئے۔

ذرائع کے مطابق انہوں نے کہا کہ ہمارے جوانوں کے حوصلے بلند ہیں، اپنے وطن کی حفاظت کے لئے وہ صحت یاب ہونے کے بعد پُرعزم ہیں، ہمارے فوجی ہماری آزادی کی ضمانت ہیں ، 78 سال بعد ہمیں مکمل آزادی حاصل ہوئی ہے۔

خواجہ آصف نے کہا کہ تین افواج کے سپہ سالار کی ہمتیں اور محبت لازوال ہے، ایک ہی رات کے اندر ہم نے ملکی سالمیت کی حفاظت ثابت کی، بھارت نے اب جارحیت کی تو اس کا منہ توڑ جواب دیا جائے گا، پوری قوم پاک فوج کے ساتھ سیسہ پلائی دیوار ثابت ہو گی۔

انہوں نے کہا کہ پوری قوم پاک فوج کے بہادر سپاہیوں کی ممنون ہے، بھارت پر حملے سے قبل سپہ سالار نے نماز فجر کی امامت کروائی وہ لمحات رقت آمیز تھے۔